創業易營運難 - 左丁山

2015年05月21日 - 蘋果

餐飲M以前係賓架，退休後復出江湖，居然做咗創業家，開地舖賣洋酒及橄欖油，捱吓捱吓，有成績噃，已經生意穩定，可交由兒子經營㖭。餐飲M話過：「憑老面皮及金融知識，帶住個仔做生意，我有經驗，佢有活力，正式係以老帶新，薄有成就，阿仔以後可以自己經營落去。」臨老創業而有此良好局面，無怪佢老懷大慰，不過又唔好唱得咁好，創業萬事起頭難，痛苦不足為外人道，餐飲M講佢認識一位行家嘅舊得力助手，係外國人B，憑太太之歐洲關係，得到一個歐洲名牌（女士產品）之特許經營權（franchise），於是幾個月前辭職另立門戶。都話過香港地遍地銀紙嘅啦，呢位外國人B寫好個proposal，話咁快就搵到投資者投資三幾千萬，立即成立公司開舖請人賣產品，唉吔，原來設計裝修會有延誤，請人唔係咁易嘅，與太太（歐洲人）一齊做生意係好麻煩嘅──以前兩人在家談情及閒話家常，感情好融洽，現在回家成晚講生意，如何營運，就幾乎晚晚鬧交，以前向老闆支薪，毫無負擔，現在自己睇住盤數，始發覺似乎日日燒緊銀紙，結果點呢，還未正式開舖，B太太已經緊張到病咗兩星期，B君就睇醫生食鎮靜劑，血壓上升，心情不暢。

金融實戰教室 - 左丁山

2011年08月03日 - 蘋果

呢日碰到新鴻基證券全盛時代與周文耀共事嘅股票Lo，做股票而姓Lo，自不然好易俾人叫做「股票佬」！大家好多年不見咯，見番講起原來佢已貴為全世界最大期貨交易所之駐港首席代表，負責中東及亞洲業務發展，推廣期貨、期權等衍生工具，譬如韓國股票指數期貨KOSPI Index，當首爾收市後，法蘭克福嘅 Eurex就會在香港時間下午四時接手，繼續有交易。

教授文章 - 左丁山

2011年04月25日 - 蘋果

一個月前與一位榮休教授吃午飯，聽佢講吓學術研究之道，得益良多。大學教授之退休年齡，間間大學不同，由五十五歲至六十五歲都有，但一啲有聲譽地位之講座教授，一定會得到大學延長服務年期，至六十五歲為止，呢類教授退休後可獲校董會授予Professor Emeritus，中文譯為榮休教授。

核子危機源於文化？ - 左丁山

2011年04月13日 - 蘋果

日本地震海嘯之後，核輻射危機至今未解決，日日令東北亞國家及地區無法安寧，擔驚受怕。我地一向以為日本好先進，做事穩陣到極，點解呢次咁死火呢？一般人難以理解真正原因。土木工程師建築邦向左丁山講解過兩三次，還是不明白，呢日佢叫左丁山自己睇一本專業雜誌，就係「New Civil Engineer International」（NCEI）二○一一年四月號，呢本NCEI在倫敦出版，空郵訂費每年七十二英鎊，算唔算貴，要由土木工程師決定。

再講YLE - 左丁山

2011年03月05日 - 蘋果

自從寫過劍橋幼兒英文試（YLE）之後，讀者反應熱烈，繼續來郵討論再提供資料。一位女士南施傳來英文電郵，表示「香港教育醒」（二月二十五日）一文，有誤導成份，指該文引用嘅PISA資料係2003年嘅，舊啲喎。嗱，香港學生參加國際PISA測驗：由中文大學教育學院統籌，今年一月中發表咗2009年嘅PISA結果，香港學生（十五歲）仍然咁醒，在三項測試方面，名列前茅。

教育死結 vs. 家長心結 - 左丁山

2011年02月18日 - 蘋果

一位讀者李來信慨嘆本港教育有死結，解不開，叫左丁山講吓，有乜死結呢？讀者李話居處附近有一位小朋友在慈幼讀中一，書包內塞滿課本與作業，重到幾乎孭唔起，這是死結之一。呢位中一生放聖誕假十日，中英數三科功課習作繁多，要每日做功課，想話出外旅行三至五日都唔得，讀者李搵校長投訴，校長話老師為了學生好，擔心學生在假期玩到忘形而忘記學習喎，這是死結之二。

文革徹底錯誤 - 左丁山

2011年01月21日 - 蘋果

陶傑前一排講及民國一百年，感慨言之，一啲大學問家於一九四九年或以前，誤信「新中國」之說，或留戀學園，不願赴臺或逃難來港，於是後來受到清算迫害，誤了一生，最好景嘅，都在學術貢獻方面，打了幾折。好彩，當年還有錢穆，唐君毅，牟宗三，張丕介，饒宗頤，陳湛銓，高明，馮康侯等等來了香港，錢唐牟饒四位大師嘅重要著作都係在香港或臺灣完成嘅，如果佢哋當年如陳寅恪留在大陸，命運會完全不同。

大學排名 - 左丁山

2011年01月12日 - 蘋果

出版M話聽港台節目「香港家書」，中大沈祖堯校長講及中大不介意大學排名，左丁山冇聽到，不知詳情。沈校長於去年十二月十六日就職典禮上，發表講辭，內有以下一段：

考試有作用 - 左丁山

2011年01月09日 - 蘋果

漂亮祖母F與馬主N等人搵埋左丁山到陸羽飲茶，講番香港傷殘運動員在亞殘會中之出色表現，仍然興奮。祖母F其實以前係公關界行尊，已經退休，養尊處優，做咗祖母仍然活力十足，見到個孫就快樂上腦，令人羨慕。

入得到未必好 - 左丁山

2010年12月27日 - 蘋果

細路哥時睇粵語片，經常有窮表哥謝賢、張英才追求有錢表妹（林鳳、嘉玲），遭受舅父（李鵬飛）白眼，教訓窮表哥，「竹門對竹門，木門對木門」嘅道理，我地就睇到眼火爆，大駡李鵬飛（不是今天之李鵬飛）為富不仁，時代變了，做人要有新思維，要搞思想革命。

朱Sir講書 - 左丁山

2010年12月25日 - 蘋果

一位傳媒前輩已經退休咗，呢日睇報紙見到有留英學生話在酒店住大廳地板，好似集中營（電視訪問嘅原文好似係：有concentration camp咁嘅feel），不禁連聲嘆氣，猛話：「啲年輕記者、編輯、學生唔好亂咁用集中營呢個名詞，住在酒店內，無風無雪，有被冚，瞓吓地板啫，就話似係住喺集中營，佢地根本都唔知道乜嘢叫做集中營，亂咁噏，捱啲咁多辛苦，就好似天跌落嚟，畢業後點捱世界呀！」呀，前輩有所不知，呢班九十後他日唔駛捱嘅啫，好得過人地有生性父母，生活無憂，佢地畢業後唔駛搵錢養家養自己嘅，可以好正氣咁去做義工，幫助非洲人。

考銀行 - 左丁山

2010年11月30日 - 蘋果

昨日講到世姪俾八十後女士問到：「你係經理呀，月入有幾多呀？」世姪於是興起考入銀行嘅念頭，希望日後月薪加花紅可以多過現時薪酬，問左丁山點考銀行？哦，考銀行不外乎上網申請，滙豐渣打恒生等都有網上測驗，考語文與數學之類，呢啲統稱Aptitude Test，合乎要求者就會收到邀請去面試，現在時興小組討論，近乎辯論與搶答，口舌便給、外表醒目之學生，佔盡上風，反之，老實木訥，外貌冇咁靚嘅，就未免吃虧。輸咗嘅人唔使向平機會投訴，以前林行止專欄引述過美國史丹福大學嘅研究，高大威猛之靚仔靚女，一生收入係多一啲嘅。

高哥利唔恨上位 - 左丁山

2010年11月23日 - 蘋果

美國人賓架Ｋ因在銀行工作四十年，退休後復出做合規工作，話明做幾耐都得，唔驚炒魷魚，佢又鍾意做噃，唔嫌辛苦。與佢拜拜之後，自太古廣場行到滙豐總行對面，碰到過往十年不做事嘅前記者Ｔ小姐，問佢：「近況如何呀？肯做工未？」記者Ｔ咪咪笑：「我做番記者嘞，負責法庭新聞。」左丁山不禁奇怪，前幾年見過佢一次，佢話唔做事去讀法律嘅噃，點解唔轉行做律師呢？記者Ｔ話：「我讀完法律啦，攞咗LLB，LLM（法律學士，法律碩士），但又唔想做律師咁辛苦，咪又做番記者囉。」哎吔，在中環做律師唔好咩，賺錢多，着靚衫，在歷山大廈，太子大廈，置地廣場返工，好醒目啫。記者Ｔ話：「我唔恨錢，唔多使錢，十年唔做工都餓唔死（因為之前嘅十年佢死慳死抵之故），點解要在中環打拼咁辛苦呀，做記者舒服好多！又唔使扮靚噃！」

合規（Compliance）長做長有 - 左丁山

2010年11月22日 - 蘋果

為咗健康着想，左丁山食過午飯後，盡量行路返寫字樓，橫掂來來去去都係在中環、金鐘、灣仔吃飯嘅啫，行路可至，出多幾滴汗，冇所謂吖。

畢業就買樓 - 左丁山

2010年11月21日 - 蘋果

到陸羽飲茶，醫生C突然出現，好久冇見咯喎，點解呢日咁得閒呢？唔通醫務所少咗病人排隊？還是古董價錢好，佢賣咗兩三件已經唔駛do呀？醫生C話：「古董市道係好好，真係百年難得一遇，我間中都會賣一兩件，但主要嘅係我係一個古董會嘅主席，現在滿任，空閒時間確係多咗。」醫生C收集古董字畫二十幾年，以前純粹為興趣，發夢都估唔到中國有今日之「盛世」，大把富豪願意以天價在拍賣場上搶貨，令佢地一班古董收藏家目瞪口呆，故此佢話一百年來未見過如此古董市場「盛世」，不必理會錢從何來，總之有錢，水浸市場啦。呢個局面會否維持一段長時間？醫生C話：「好難講嘅，學你話事偈，音樂不知何日停，繼續跳舞可也！」

日本往下流 - 左丁山

2010年11月03日 - 蘋果

珠寶界公子Ｌ最近經常在飯局缺席，星期五終於出現，問佢去咗邊，佢話在印尼買入珍珠養殖場，但管理養殖場嘅公司就設於東京，所以佢經常出差，近來坐飛機多過坐地鐵。不講不知，養珍珠技術，以日本人最先進，日本有不少海洋生物學家，研究培養珍珠多年，知識與經驗最為豐富，在澳洲、印尼，以至大溪地嘅Pearl Farm，都有不少日本專家管理。

無樓不嫁 - 左丁山

2010年10月29日 - 蘋果

運輸與房屋局局長鄭汝樺出席青年協會安排嘅「與青年人對話」，有四百三十名大學生、中學生出席，唔知有幾多人發問，但所有報紙都捉住一個「頭條問題」嚟報導，就係《明報》講及一位中文大學國際貿易及中國企業課程一年級新生王俊堯。一年班新生嘅標準年齡係十九歲，家啲學生大概好早熟，已經談婚論嫁，應該係中學時期已經拍緊拖嘅嘞。呢位王同學話：「我女朋友早前跟我說：『你買不到樓我不嫁你』，我不知怎樣做……」（《明報》十月二十四日 A1版）

牛津求財 - 左丁山

2010年09月27日 - 蘋果

前一排，香港最後一任總督彭定康以牛津大學校監身份來港，主要目的係為咗籌款。肥彭係牛津校友，今日係牛津校監，為母校籌款，特別落力，佢未到港之前一個月多啲，牛津大學聘請駐港校友聯絡總監，有人叫過左丁山推薦一兩位去應徵，知情人士講明，牛津校友當然最好，但其他大學嘅畢業生，亦歡迎應徵，剛離任嗰位總監，都唔係牛津校友啫，之不過，英文一定要好好噃。咁又係，英文唔好，如何應付彭定康及貝理雅呢啲頂班校友？之不過，一位英文極好嘅七十後話佢自己唔係牛津生，唔好意思去應徵，於是作罷。肥彭來港密訪本地富豪，當然係想搵人捐款啫，之後又去咗北京，目的相同，所以話現代一流大學，經常為經費傷腦筋，校監、校長嘅一個主要職務，就係向外籌款，向校友籌款，只有香港一啲不食人間煙火，未見過世面，或者扮純情嘅評論員，會指責富豪捐款畀大學係為咗沽名釣譽，指責大學市儈向富豪乞錢。

逆水行舟 - 左丁山

2010年09月23日 - 蘋果

科技產品市場，最合「逆水行舟，不進則退」呢一句，瑞典科技工業愛立信手機，曾經好威，而今安在？與日本新力合作製造「新力——愛立信」品牌之後，憑新力之名，亦無法令手機翻身；摩托羅拉手機大哥大，係經典之作，值得擺在博物館，一九八六時，左丁山揸住部水壺大哥大出街，中環都唔知有幾多人向左丁山行注目禮；摩托羅拉手機曾經領先全球，但大阿哥席位，早已俾諾基亞搶咗，而今諾基亞又落難，要搵美國人救亡，LG電子與三星競爭手機市場，落得大敗收場，主帥辭職。左丁山歷年用過嘅手機牌子，有摩托羅拉、Panasonic、愛立信、GE、飛利浦、三星以及現時嘅iPhone4，不得不承認，「蘋果」後發先至，成功將電腦與電話結合，成為二十一世紀尖端手機，將諾基亞拋在後頭，抵Steve Jobs沙塵。

諾基亞的教訓 - 左丁山

2010年09月22日 - 蘋果

今時今日，隨街都見到iPhone，一啲朋友就用Google系統嘅Android智能手機，例如HTC與三星，當然幾乎每位賓架都揸住部黑莓，如果至今仍然用諾基亞，喂，老友，out out地咯喎。