教授文章 - 左丁山

2011年04月25日 - 蘋果

一個月前與一位榮休教授吃午飯，聽佢講吓學術研究之道，得益良多。大學教授之退休年齡，間間大學不同，由五十五歲至六十五歲都有，但一啲有聲譽地位之講座教授，一定會得到大學延長服務年期，至六十五歲為止，呢類教授退休後可獲校董會授予Professor Emeritus，中文譯為榮休教授。

榮休教授同左丁山講：「七十後及八十後嘅大學教師，新嘅做助理教授，最叻嘅已經做到教授，多數人係副教授，現在學院之中嘅競爭非常劇烈，冇一至三篇論文在國際權威期刊刊登，好難出人頭地，吃學術飯係好辛苦o架，如果人在大學，心在社會，難以集中精神做研究，休想升做教授。」咁又係，莫講大學學士，依家博士都多到隨街走，有博士學位唔係入大學教書嘅證明文件。對後輩有乜指點呢？榮休教授話：「我見到一啲年青學者常在報刊發表文章，往往失諸粗疏，言論唔夠嚴謹，引述資料未經比對，實在有失身份，記者係咁寫就話啫，教授噃，點可以呀。呢啲文章係求大眾虛名啫，大學唔會睇嘅，教授寫公共政策評論，尤其是要清楚掌握事實與所有理據先至好下筆，否則與左丁山專欄何異！」

哎吔，左丁山日日急就章，點可以同博士級學者相比呀，希望榮休教授睇GiGi細語，唔好要求咁高，得啖笑就得o架嘞。四月二十日明報有篇「改變學習模式、設計校本教材書」，作者葉兆輝，係香港大學社會工作及社會行政學系教授，內文指香港教科書貴過新加坡，書商壟斷，分拆書本上下冊等等，如果呢位葉先生唔係港大教授，只係家庭與學校合作事宜委員會副主席，都算啦，但佢唔係噃，不禁想起榮休教授之言，不禁長嘆一聲。做學者，下筆之前，基本訓練係先先review of literature，睇吓有乜同類評論先，如果讀完林本利教授（壹週刊）、案內人（明報）與韓連山（蘋果）、教評會通知（三月二十八日），以及查閱新加坡之教科書出版實況，葉教授會點寫呢？