香港終會變成內地二線城市？ - 王緝憲

2025年2月25日 - 信報

上周《紐約客》（New Yorker）刊登一署名文章Trump's Putinization of America（特朗普將美國普京化）。這不禁讓我想起，最近不論到內地哪個城市，都有朋友問我同樣的問題：香港正在變成一個內地的二線城市，怎麼辦？注意：他們認定香港已經開始「內地化」。這個問題比較敏感，但與其迴避，不如擺上桌面討論一下。

諾獎得主倡港經濟增包容性

2025年1月17日 - 信報

2024年諾貝爾經濟學獎得主、《國家為什麼會失敗》（Why Nations Fail）一書的作者詹姆斯羅賓遜（James Robinson）昨日出席港大經管學院舉辦的論壇時表示，若一個經濟體在經濟領域和政治領域均為廣納型（inclusive），即容許人們發揮創意及實踐創新意念，該經濟體就會邁向繁榮富裕。對於香港未來經濟發展，他認為，必須保持及提升社會的包容性。

學者建議放寬行業監管

談及如何讓香港經濟更具包容性，同場的香港大學金融學講座教授陳志武指出，現時所有有利可圖的行業幾乎都沒有足夠競爭，利潤或多或少都被行業龍頭佔有，例如怡和、太古、滙豐等。

從iPhone 16「半閹版」看香港價值 - 高天佑

2024年9月23日 - 信報

最新款iPhone 16久違地再掀炒風，大批內地客攜着數萬元現金來港掃貨，他們解釋：「不能接受內地的『閹割版』新機沒有AI功能。」但實際上，香港版iPhone 16似乎也不能使用ChatGPT，相信只能用「文心一言」或「通義千問」，某程度上可算是「半閹版」。不過對於內地用戶，「有得用」總好過「冇得用」。從某個角度看，這也可能是香港未來在國家大局中的價值所在。

西式民主失效，再思善治之路 - 劉炳章

2024年5月29日 - 信報

2024年是全球「超級選舉年」，70多個國家及地區進行關鍵的選舉，備受關注，甚或視作西式民主的考核之年。

西式民主制度以投票作為體現人民對政府認受的主要標準，現實卻是選舉常出現「非民主」的結果。一場選舉，需要鋪天蓋地的宣傳、造勢，資本力量較大的一方透過媒體、文化等影響選民心理，而美式選舉經費無上限，根本就是大財團及大企業的利益代理人博弈，結果往往是少數私人利益凌駕大眾利益，選民慘被愚弄戲耍。

美國前總統卡特曾經慨嘆，沒有兩三億美元，民主黨共和黨都不會給你提名，根本選不了總統。美國政治體系已是基於大量資金支持的「寡頭政治」，參選者需要支付競選團隊人員工資、雜費、宣傳費用，競選過程與其說是爭取民意、考驗政策宣說，不如說是考核財力。無怪乎多番選舉，「民意彰顯」後，美國貧富懸殊繼續惡化，種族歧視依舊嚴重，金權輪莊，平民百姓何來得益？民意調查機構蓋洛普（Gallup）本年初揭示，僅有約28%美國人滿意現在民主制度在美國的運作，是數十年來新低。

學生減少的真相 - 李道

2023年7月25日 - 信報

教育局公布新年度《學生人數統計報告書》，幼、小、中的學生總數連續三年下跌，尤其按升班人數比較的話，近乎各級均見流失。想當然耳，坊間馬上歸咎於「移民潮」此一「萬能key」；惟事實上，真相是否如此？

按升班人數比較的優點，是排除了出生人口減少的因素。譬如，比較今年小一與去年小二的人數差異，如果錄得跌幅，便反映原來在港讀書的學生，現在卻放棄在港升班捨港他投了。反之，比較今年小一與去年小一的人數差異，則會受6年前與7年前的出生人數影響，更多只能形容為「減少」而非「流失」──後者強調包含着「由有到無」意涵。

然而，是否所有「流失」皆「移民潮」所致？

老細（你懂的）唔啱聽 - 方卓如

2016年11月2日 - 信報

政治一日都嫌長。美國選總統，臨近選舉日爆出希拉莉電郵風波要重新開快勞調查，今次真係驚。民主黨領䄂都要出聲批評FBI局長試圖影響選情，特朗普由民調大幅落後到最近相距收窄甚至接近，下星期真係有機會出現今年最後一次亦係最大嘅冷門結果。同英國脫歐一樣，市場一早price in熱門勝出，買中都唔會點升，隨時仲會跌啲，只不過冇冷門結果跌得咁勁。下星期，希拉莉贏唔會大升，特朗普贏肯定會跌。正路分析，沽定等結果，輸極有限。

沽定等結果

今期《經濟學人》有篇文章，指華爾街首次唔支持共和黨總統候選人，情形就好似香港嘅商界唔支持建制派。原因係特朗普一啲都唔似傳統保守嘅共和黨人，佢出身商界但靠激同民粹起家，華爾街冇辦法支持一個民粹嘅候選人。

生活喺預期之中 - 方卓如

2016年10月21日 - 信報

巴塞對曼城，曼城就係輸喺哥帥手下。佢唔畀隊員大腳踢，一定要傳畀隊友，所以龍門出迎都唔敢大腳，細細力傳咗畀對手，繼而後防又唔敢大腳解圍，寧願細細力後傳，又傳咗畀對手。兩球細細力就輸咗兩球。

巴塞嘅踢法要有班巴塞球員先靈，換咗拜仁同曼城，威力大減，仲自暴其短。兩星期後曼城再對巴塞，準備捱眼瞓。

星期四晚個個出晒街，當正星期五，因為全部預計今日唔使返工。萬一估錯，又或者天文台收到政治任務，要香港星期五繼續開市，我肯定今朝特別多人告病假。人類要生活喺預期之中，萬一預期落空，會生活大亂。

最多人懷着戒心 - 方卓如

2016年10月24日 - 信報

10月只剩下一星期，睇嚟又可以大步檻過，避免一個股災10月。而家應該係史上最多人懷着戒心嘅時候，從來股災都係發生於紙醉金迷之中，不知不覺間奪去你的財富。咁多人準備股災嘅來臨，個個都識睇嗰市就嚟爆，從未試過。

傳統智慧多數人係錯，少數人先啱，是否代表嗰市唔會冧？

唔係香港先有人睇淡，Bloomberg都問下一輪危機來自何方。最直接嘅答案，梗係邊度借爆廠，邊度借過龍，邊度就係危機。中國肯定係危機嘅熱點，Bloomberg都咁講。情況就好似紙牌屋一樣，搭建得搖搖欲墜嘅紙牌屋，一推就跌。只要唔推，紙牌屋仲可以好哋哋有排玩。

全世界都係搖搖欲墜，只係中國嘅紙牌屋搭得特別高，更容易推冧。

點睇 - 方卓如

2016年9月30日 - 信報

「方帥，年底選委會選舉，點睇？」

「點睇？可以點睇？上屆嘅觀察，有超過一半選委票係控制晒，唔會有閃失。但上屆嘅超過一半，都只係多89票，非常掹車邊。今年，點會畀呢種情況再發生？可控性一定要提高，一定要確保想邊個贏就邊個贏。你呢邊泛民咁囂張，要攞300選委票造王，咁另一邊惟有派出絕對死士，要絕對服從嘅先畀你出選，就係要你做人頭。同時間，更加唔會派兩個特首候選人畀你真選，以免萬一有啲人真係連個印仔都唔識扱，畀錯咗另一個，咁泛民咪真係造王成功？選委唔係真係畀你選特首，愈係似真選舉，選委就更加冇得真選。可以預期，立法會嗰種赤裸裸嘅唔准入閘，必定會延續到選委選舉。」

「咁下屆邊個做特首，你又點睇？」

唔要真相只要似模似樣 - 方卓如

2016年9月20日 - 信報

iPhone 7同iPhone 6分別唔大，但的確有分別。Home鍵變成MacBook嘅同樣感覺，有啲奇怪；鏡頭靚咗，不過你都係當佢儍瓜機咁用，亦只會喺手機睇相；冇咗耳機插頭，焗你將來用無線耳機，但係你平時聽歌又唔會太大影響。總結一句，iPhone 7冇一樣令你唔換唔得嘅理由，但係你會換機，因為而家手機預期壽命只有兩年，兩年下來手機跌過無數次，刮花、入水、電池折壽，呢啲先係你換機嘅理由。而家做生意，唔係要做得更好令顧客繼續畀生意你做，而係要上手做得較差，顧客頂唔順，逼住要畀生意你做。你嘅首要任務唔係提供完美產品，而係製造一個走唔甩嘅環境，令顧客留喺你身邊。唔適應呢種生意模式嘅，儍更更諗住做到完美自然有生意嘅，隨時被時代淘汰。

讓特首試吓post-truth世界

梁特嘅橫洲事件，開始令人發覺環保朱口中嘅「官商鄉黑」開始慢慢現形，全靠嚇佢要佢收聲嘅人，因為環保朱當選唔足以令香港人關心「官商鄉黑」，橫洲呢處地方隨時聽都未聽過。但而家，家家戶戶都知道橫洲唔係咁簡單。政治事件好多嘢係事前預計唔到，亦冇得精確計算。希拉莉無端端肺炎，或者其他不知名病發，隨時就係咁就病走個總統寶座。橫洲本來唔入屋，城市人唔關心新界啲地點用。到而家發覺利益原來大到要攞人命，再印證之前咁多金毛口罩人支持梁特，成件事就好合情合理，真相活靈活現。

正義通貨膨脹期 - 方卓如

2016年9月9日 - 信報

「方帥，而家幾恐怖喎，連準議員都冇面畀，搞到佢覺得自己有生命危險。佢係票王，全香港都識佢，有乜冬瓜豆腐，實要交個人出嚟坐十碌八碌。你估乜嘢人咁沙卜，買棺材唔知埞？」

「草蜢仔，你冇睇《城寨英雄》咩？直情係而家社會縮影啦。香港咪好似城寨一樣，冇晒王法，邊個拳頭硬邊個話事。最惡咪就係喺城寨入面有利益關係嘅同鄉會囉，要打你就打你。居民要自保，咪惟有團結一齊編更表，守住條街喉，守得幾耐得幾耐。

文弱書生　惡人落重藥

「不過，唔好忘記，出力守住城寨嘅，最後都死得七七八八，剩低嘅街坊就安居樂業，笑笑口，好快唔記得邊個死鬼咗。為香港仆心仆命嘅人唔少，咁多年前仆後繼，通常你只係記得最後嗰個，前面嗰班你已經唔記得咗。搞大佢非常正確，唔係要啲惡人知難而退，係要佢重手咗攞咗人命之後，警察都唔會求奇銷案算數，總要捉番個人出嚟踎監填命。」

上癮嘅都要戒 - 方卓如

2016年8月30日 - 信報

立法會選舉，今屆有最多年輕人參選，亦係最少有頭有面嘅人參選，點解？

2004年係七一後嘅選舉，當年係中產參政，貼地中產覺得唔對路，原來唔出聲嘅話隨時連命都冇，所以走出嚟參政。12年之後，中產變得離地，學生先係最貼地。

以前中產參政有成本，成本在於搵少咗，大律師參選大概個個都必定收入大減。12年後學生參政，成本更大，分分鐘連命都冇，保得命嘅可能要坐監，就算唔使坐監，前途隨時比坐過監更慘，冇人肯請，冇工做。

留啲畀下一手 - 方卓如

2016年2月23日 - 信報

滙控（00005）係世界級銀行，佢業績唔多好，證明全世界嘅銀行都難做。滙控第四季成績最差，亦即係全世界開始冧價嘅時候。遲啲到內銀公布業績，你可以比較吓，究竟資產冧價，對內地銀行有幾大影響。唔一定同滙控睇齊，隨時壞賬冇大幅飆升，表示全世界銀行生意難撈，內地銀行都可以有本事逆周期而行。

4年前我去過台灣睇總統選舉，當時馬英九係威係勢。由高雄睇到上台北，佢哋啲造勢晚會，有啲似街坊神功戲乘涼晚會，擔凳仔，有飲有食，背景音樂一定播住襯底，一到台上語帶激昂，音量即時推高。你咪話，真係牽動情緒，覺得已經贏咗。台式造勢晚會已經吹到嚟香港，一樣係音樂襯底，台上表現。而家只係小試，到9月，肯定有更精采嘅造勢大會。香港係咪會學足台灣？議會衝擊已經學緊，下屆衝擊嘅人多咗，肯定更激；台灣有時代力量，香港下屆都會有時代代表，必定會有打破年齡紀錄嘅議員出現。第三條路，咪就係泛民建制以外，呢啲年輕嘅，冇跟過任何大佬嘅素人囉。

從來活在危機之中 - 方卓如

2016年2月25日 - 信報

同樣係做官，財爺講嘅係人話，全城即刻皇恩浩蕩，直情好似希伯來人遇見摩西，等佢打救，由佢做特首咁就一天都光晒。唔好話香港人坎坷或要求低，有人走出嚟賣口乖就眼前一亮。畀人折磨虐待咗3年，搞到大家人唔似人、鬼唔似鬼，識講人話嘅官，我哋以為已經一早絕晒種。財爺快啲開Facebook，唔係畀人like你，係畀人睇你like乜，咁就知你係賣口乖定真材實料。

早前講過美國、歐洲、日本、中國、產油國，全部都有危機，問題係邊個爆先，雖然爆先嗰個都會拖冧全世界，但未爆嘅就等如危機唔見咗。咁你估邊個爆先？產油國差唔多全部都係單一出口，唔賣石油都冇嘢賣，點減產？最弊係伊朗解除禁運，佢咁多年都未賣過油，冇賣油收入，都係日復日咁產油。而家可以賣，賣得一蚊都係賺，點會減產？委內瑞拉，接近全國破產，唔賣油，饑荒都似，點減產？油價可以由高位跌近八成，全球需求冇減少八成啩。所以炒賣活動同實體經濟係息息相關，千祈唔好再迷信咩埋頭工作、不作炒賣，唔係嘅話你突然畀人炒咗都唔知咩事。

建制一樣可以本土 - 方卓如

2016年3月1日 - 信報

新東補選結果，有兩點要留意。之前講嘅棄六保七係啱嘅，贏一萬票係險勝，如果唔係全力截住隨心而投，要理智集中投七，可以預期六號票數更高， 七號就僅敗，呢個情況絕對有機會出現。本土派嘅票應該比而家嘅15%更高，自由隨心投票的話，點止六萬幾票？

當然，候選人本身質素都係重點，無可否認楊岳橋話梁天琦係高質素嘅對手，此話並非敷衍行貨， 睇辯論睇答記者問題就知，水平拋離一批抽水中坑幾條街。將來本土能否保持聲勢，都要靠拋個身出嚟嘅人。

唔係啱只係未錯 - 方卓如

2016年2月12日 - 信報

恒指跌700幾點，成交唔夠700億，證明好多人仍然放假中，未開市，還未參與沽貨行動。市場仲等緊特大嘅爆煲事件，未有大鑊嘢出現，跌市係唔會完，冇人會肯放膽入市。

日圓突然大升值，換番嚟嘅日圓究竟擺咗喺邊度？日本存錢負利率，股市下跌，國債孳息率穿零，冇一樣日圓資產係可以為你帶來正回報，但係市場爭相購買日圓。經濟學嘅理論好多時候唔能夠搵到直接證明佢係啱，只可以等證明佢錯嘅事例幾時出現，出現之前理論都仲係正確，唔係啱，只係未錯，2016年相信會打破好多經濟理論。唔好以為係學術討論，唔關你事。經濟理論錯誤，表示政府會有好多錯誤動作，會搞到你生活得好艱苦。

政府做錯嘢嘅機會其實比做啱嘢係大好多，因為而家世界互相糾纏，千絲萬縷，政府跟唔上時代係好自然嘅事。

仲慘過唔係真嘢 - 方卓如

2015年5月6日 - 信報

點解消費品商肯畀咁多錢搵明星做代言人？佢哋講嘅對白，其實搵邊個講都得，仲可以講得又準又好聽，樣子亦可能同樣甜美。花咁高溢價，究竟為乜？咪就係講嘅內容唔係最重要，邊個把口講先至係最sell到，你焗住貴一貴都要搵個明星去做代言人。

而家政府推政改最敗筆係乜嘢？咪就係佢哋搵啲出嚟講嘢嘅人，唔單止sell唔到，反而仲會令人抗拒。噚日，董伯出嚟話袋住先才可以唔袋一世，唔袋住先反而一世都無。嚇人，大你，本來都係一啲好常用嘅推銷手法，香港人好明白，但大前提係你唔可以俾人覺得你嚇緊人、大緊佢，要好subtle咁表達。董伯一向唔係明星，佢以前嘅豐功偉績，忘記了都如今俾佢提醒番。再加埋其他形象根深柢固當香港人儍嘅男男女女，往績鐵證如山，佢哋聯群出嚟狂sell政改，即係地產經紀話凶宅係基督徒之選，擺明就係想昆你，明明係筍盤都俾你搞衰啦。

經濟好個巿先冧 - 方卓如

2015年4月23日 - 信報

大時代，大市升到咁高，啲人就會問，幾時冧。其實呢條問題好易答啫，你知道答案之後，更加放心衝入去買。

冧市通常都係event driven，一定係有啲事件將個市推冧。

錢多而推動嘅市況，佢無端端唔會大冧；一跌，總會有人買番，資金總要找尋出路。所以你見美股升完之後上上落落橫行，你賺完沽貨，畀我接再坐，等下一個再接。

最後一個國父 - 方卓如

2015年3月24日 - 信報

地球上最後一個國父李光耀都死埋，而家除咗ISIS之外，都冇開國呢回事，國父呢啲咁grand嘅term，而家都冇人擔當得起。佢在任嘅時候新加坡學香港，佢唔撈之後到香港學番新加坡。究竟係新加坡超越咗香港？定係香港倒退寧願放棄踏步向前？去過新加坡嘅人都唔想香港變成咁，但事實係，香港可能已經變得衰過新加坡。乜都唔使講，人哋住間屋已經一定大過你。城市係有生命，花無百日紅，小津都可以曾經係金融中心，香港曾經係威係勢，要沒落唔好以為係天方夜譚。

雖然李國父死咗，但睇番佢之前喺電視嘅訪問，直情為而家嘅香港把脈斷症。

新加坡都有共產黨，李國父本身好討厭共產黨，但權力未鞏固之前，都要同佢哋扮friend，深藏不露。用佢嘅說法，係腳踏實地、務實，講完。新加坡共產黨都未聽聞係啲厲害團體，性格強如李國父喺羽翼未豐嘅時候都要吞聲忍氣，香港人有時要問自己，究竟想發洩定係事成，好多時候想事成就唔到你發洩。

停完跌得仲勁 - 方卓如

2015年1月20日 - 信報 

上海A股一日可以跌7%，唔好忘記，A股有跌停板機制，即是百分之七應該係未跌完嗰隻，仲要再跌先啱數。跌停板這個動作，究竟係阻止再跌，定係會加速跌完再跌？好簡單啫，如果你想沽貨，今日因為跌停板，沽唔到，第二日開市仲唔嗱嗱聲繼續沽？你本來唔想沽，但一日跌停板，第二日跌停板，第三日又停。如是者連跌三日，你忍得一時，忍唔到三日，最後都會嚇到被震走。

想接貨又如何？第一日急跌，你睇定啲先接。一停，你買唔到。第二日，你睇定先，又停，又唔買住。如是者驚住沽貨，接貨嘅睇定先睇到停，只有沽壓沒有承接，想唔跌到一仆一碌都唔得。

冇跌停機制又如何？香港一日跌八九成都夠膽死，驚嘅、要掟貨嘅，成道門打開任你走火警，人踩人爭先恐後，死傷枕藉，但全部走晒。想接貨嘅，股價一次過推到落去抵到爛嘅水平，瘋狂入市追貨，股價掉頭回升，之前沽唔切嘅反而睇定先，唔沽住。這類一日內大跌大升回復原狀嘅例子比比皆是。第二日即刻回復正常，好似冇事發生過。咁你話，有停板好定冇停板好？