停完跌得仲勁 - 方卓如

2015年1月20日 - 信報 

上海A股一日可以跌7%，唔好忘記，A股有跌停板機制，即是百分之七應該係未跌完嗰隻，仲要再跌先啱數。跌停板這個動作，究竟係阻止再跌，定係會加速跌完再跌？好簡單啫，如果你想沽貨，今日因為跌停板，沽唔到，第二日開市仲唔嗱嗱聲繼續沽？你本來唔想沽，但一日跌停板，第二日跌停板，第三日又停。如是者連跌三日，你忍得一時，忍唔到三日，最後都會嚇到被震走。

想接貨又如何？第一日急跌，你睇定啲先接。一停，你買唔到。第二日，你睇定先，又停，又唔買住。如是者驚住沽貨，接貨嘅睇定先睇到停，只有沽壓沒有承接，想唔跌到一仆一碌都唔得。

冇跌停機制又如何？香港一日跌八九成都夠膽死，驚嘅、要掟貨嘅，成道門打開任你走火警，人踩人爭先恐後，死傷枕藉，但全部走晒。想接貨嘅，股價一次過推到落去抵到爛嘅水平，瘋狂入市追貨，股價掉頭回升，之前沽唔切嘅反而睇定先，唔沽住。這類一日內大跌大升回復原狀嘅例子比比皆是。第二日即刻回復正常，好似冇事發生過。咁你話，有停板好定冇停板好？

香港人「愛財」多過「愛才」

有評論話，停咗投資移民，改為人才移民，對香港益處更大，因為而家香港唔係缺錢，係缺人。聽到呢句說話，你唔暈低，證明你唔愛香港。

香港人由上至下，鍾意錢多過鍾意人。你引入專才，正如嗰個人點名話齋，佢哋有才但冇財。唯一功能，就係嚟香港賺你嘅財，與你爭財。

香港人可以有幾鍾意？投資移民就唔同，佢哋放低咗一千萬，人都未必嚟香港。就算嚟，以佢哋至少有一千幾百萬身家，都去哥爾夫球會同馬會，滾搞啲有錢人而唔係平民百姓。又唔會嚟香港搶你份工，仲帶埋錢嚟俾你哋一忽一忽咁割，仲有投訴？

而家掉番轉，唔要錢，換啲人嚟搶你錢，仲要講到好似皇恩浩蕩，有嘢益你，呢啲咪叫政治囉，玩完你一鑊仲要你多謝佢。點呀，係咪齋講財經唔好講政治？

唔講政治淨係講財經，輸死你。