要拚命去生存 - 方卓如

2015年1月21日 - 信報

風水佬呃你十年八年，口水佬講嘢一日就見真章。噚日話跌停板機制反而會跌唔停，跌得深，冇反彈。以AH券商股為例，中信証券A股（600030.SH）昨天跌多近9.9%，H股（06030）卻反彈近6%；海通証券A股（600837.SH）昨天跌多近9%，H股（06837）就反彈8.3%。你可能話：「唓，係咪H股冇跌停板，跌過籠呀？」中信証券H股喺大跌市日，一日跌16.4%，第二日就反彈；海通一日跌16.5%，第二日又反彈。A股第一日跌停板，第二日跌近9%，兩日拉勻即係跌18%有多，仲未反彈。咁你話，有冇跌停板好？

點解香港人近年咁氣頂？明明自己有啲好嘢，唔知邊個，硬係要我哋改，模仿一套落後啲嘅。口就話要發展，原來係要向後發展。

港人自私無知玩殘自己

龜兔賽跑最多都係停喺到瞓覺等，而家仲要倒後行，情何以堪呀，大佬？香港人已經好順民，真係專心賺錢唔講政治，而家仲要話唔要錢要人，搵多啲人嚟爭飯食。已經放棄了生活喇喎，連生存都唔畀？

你可能話：「唓，能者居之嘛，你加強競爭力，咪唔怕人哋同你爭囉！你要靠保護先有飯食，係放棄自己。」錯到極，你冇睇報紙咩？投行高層請人係睇你能力，定係睇你阿爸嘅生育能力？唔使多解釋喇啩，學董伯話齋，畫畫畫出腸？遲吓呢股請人風氣就會蔓延至其他專業，邊個阿爸可以幫到手搵生意，就請邊個，到時候你有能力都冇用。香港人舒服咗咁多年，終於要同內地同胞睇齊，明白要生存唔係咁易，日日都係一場硬仗。

講開董伯，有冇睇佢記者會？多謝佢，令大家記番起點解以前香港人咁唔鍾意佢。早前話香港人開始懷念佢，都係假象，查實邊個只要收埋自己一排，善忘兼善良的香港人就會唔記得好人的壞事，甚至乎壞人的壞事。只要返出嚟一開口，啲記憶就會好似師兄弟咁番晒嚟。

一句講晒，而家嘅萬能key係，「點解你得我唔得？」潛台詞係，有權嘅乜都得，冇權嘅我話你乜都唔得。

所以董伯可以用香港人身份講香港事情，香港良心反而唔可以講香港事情時忘記自己身份，這個身份位置時空交錯嘅問題，只有5歲小朋友才可以明白。

搞到今日嗰場咁，絕對係香港人自己一係因為私利，一係因為無知而玩殘自己，與人無尤。

以後點？有冇睇羅德丞嗰本傳記？佢爭輸咗，做唔到特首同幕後推手，有人問佢之後打算點，你知唔知佢點答？佢話：「仲搞？我而家只係諗點可以仲有飯食咋！（大意）」你快啲去諗吓點生存啦，喺爛地場唔容許你學阿仙奴咁，慢慢帶住個波搓來搓去喇。