奧巴馬唔夠叻 - 方卓如

2015年1月22日 - 信報

國情咨文同《施政報告》有什麼分別？我問呢條問題，都覺得自己有點兒白癡，最叻嘅男人做出嚟嘅嘢，邊有得同佢比？唔係點值咁高人工？公布完之後仲即刻要加人工獎勵，真叻。但兩者係有啲明顯分別，國情咨文，應該冇人可以瞓得着覺，又拍手，又企起身，完全冇一個寧靜嘅環境。最重要係，奧巴馬都學最叻嘅男人，用市民嚟做案例講故事。只不過，奧巴馬真係有名有姓，去講呢兩個市民嘅故仔，而且個女嘅，仲「生勾勾」坐喺度聽奧巴馬講嘢。國情咨文用人嚟講故仔搵真人，梗係唔夠最叻嘅男人搵個虛擬嘅細路仔咁叻啦。

香港中產經濟崩潰

奧巴馬講乜？講middle class economics。佢要照顧嘅，就係打工捱世界嗰班，令佢哋捱得值，捱得開心，捱得有希望。最叻嘅男人剛剛相反，打工捱世界嗰班，聽到將來會有大量專才南下同佢哋爭飯碗；佢哋嘅細路仔，將來要去內地姊妹學校交流。之後仲發現，原來要17年唔飲唔食，先可以買層樓。香港嘅middle class economics，可謂經濟崩潰。邊個打工仔可以捱得有希望？

投資移民突然剎停，一班靠呢瓣搵食嘅團隊，未來兩個月都會殺紅了眼，要盡攬餘下萬幾個入咗表嘅客仔。呢度講緊千幾億，就係這一年年頭的金融市場動力。過了這一水之後，一節淡三墟，年中後就生靈塗炭喇。

亞視白武士等執平貨

據報如果下周一冇白武士出現，亞視就要清盤。咁突然？呢兩日先話有6個買家有興趣入標，而家話下星期一要清盤，嗰6個白武士仲會入標？梗係等你清盤之後，慢慢傾啦。你清盤，先有機會將股東啲債剃頭剃得狠啲，炒員工又可以狠啲，唔要嘅資產更加可以順勢剝離。喺呢個時候話要清盤，唔單止唔會迫到買家快啲扑鎚，反而仲叫佢哋等吓先，遲啲執平貨。