得閒讀吓歷史 - 方卓如

2015年1月23日 - 信報

我師傅好耐冇出場，梗係要聽吓佢有乜嘢吩咐啦。佢話而家香港人就真係要認真了解中國喇，因為以後香港都係要睇中國發生緊咩嘢事嚟做人。唔好覺得好唔舒服，亦唔好話乜唔係「一國兩制」咩。完全唔關乜嘢政制事，你隔籬有個咁大嘅國家市場喺度，就算你好似新加坡獨立於馬來西亞咁，唔通你唔受隔籬影響咩？你可以獨善其身咩？

師傅話疊埋心水認識中國

新加坡起碼都要搞掂自己要有水飲，唔係就一早滅咗國。更何況唔好話搞，就算講獨立，香港人都唔夠膽，更加要疊埋心水好好地認識中國啦，愈早你愈有着數，愈遲你就愈死。

尤其係如果你搞金融嘢，唔識中國，你不如轉行。你睇賭業股，係佢手氣差咗輸多咗，定係啲賭客俾人閘住咗？你睇A股，係咪阿爺諗計留番啲錢喺內地同吸乾埋你香港啲錢，要搞旺個A股市場？唔同板塊嘅行業盛衰，係自然發生定係長官意志？唔好話中港市場啦，全世界最大嘅莊家就係政府，你睇瑞士歐洲，睇吓啲油價，知道地球上嘅政府諗緊啲乜嘢，你先懂得催吉避凶。中國喺正你上面，更加要學識睇得通。

我師傅睇嘢咁有心得，就係因為佢鍾意讀歷史，對世界事情循環嘅研究非常有心得。金融事件往往係重複又重複，一浪接一浪。你得閒都睇吓過去幾廿年發生咩事，對你明白點解今日世界搞到咁，好有幫助。點解啲有錢人或者啲金融人，可能滿腹牢騷，但甚少突個頭出嚟講得好大聲？未必係因為佢哋為咗錢揸頸就命，亦未必係因為佢哋冷感，更加唔會係佢哋冇受影響，佢哋好多時候特別首當其衝。佢哋做得呢行，又搵到錢，係因為佢哋睇嘢夠通。以後嘅世界，唔好再有太多包袱，放開啲心態，睇通啲。你都係得嗰幾廿年命，睇唔通，好難生存得開心。