點睇 - 方卓如

2016年9月30日 - 信報

「方帥，年底選委會選舉，點睇？」

「點睇？可以點睇？上屆嘅觀察，有超過一半選委票係控制晒，唔會有閃失。但上屆嘅超過一半，都只係多89票，非常掹車邊。今年，點會畀呢種情況再發生？可控性一定要提高，一定要確保想邊個贏就邊個贏。你呢邊泛民咁囂張，要攞300選委票造王，咁另一邊惟有派出絕對死士，要絕對服從嘅先畀你出選，就係要你做人頭。同時間，更加唔會派兩個特首候選人畀你真選，以免萬一有啲人真係連個印仔都唔識扱，畀錯咗另一個，咁泛民咪真係造王成功？選委唔係真係畀你選特首，愈係似真選舉，選委就更加冇得真選。可以預期，立法會嗰種赤裸裸嘅唔准入閘，必定會延續到選委選舉。」

「咁下屆邊個做特首，你又點睇？」

「點睇？點會識睇？盲嘅都知道而家香港搞成咁，邊個先係罪魁禍首。但弊在唔係佢，又會係邊個？你哋成日撈亂香港同香港人。香港人可能水深火熱，慘無人道，但係香港好人好姐，有乜問題？股市24000點，重回大時代之前。地產商依然高價投地，賣樓仲可以加價加推，香港有乜問題？如果你喺北京嚟到香港生活，半山買了一層樓，出入中環雪茄吧，睇病走去養和住幾日，香港直情係天堂。你用香港人眼光去睇香港，梗係諸多唔順眼。但如果你從北面睇香港，冇乜問題。要搵個代理人睇住檔攤，讓北人繼續在港經營，有邊個可以絕對服從。你話某人有太多罪行？咁咪更加肯定聽教聽話。係呀，愈諗愈毛骨悚然，但係事實就係咁恐怖。」

「咁今年最後一季，你又點睇？」

「點睇？快手捱埋佢，搵得幾多得幾多。今年竟然無風無浪，如果捱到年尾都冇事，真係要還神，咁下年就非常凶險。冇理由可以畀你賺足10年。10年都冇一次大屠殺，過去50年都未試過，10年總有一年係向下大插。今年只剩3個月，唔好諗咁多無謂嘢，盡情賺個夠。」