最有錢嘅有錢人最煩 - 方卓如

2016年10月3日 - 信報

白手興家嘅超級香港富豪，而家只係走剩兩個姓李嘅。他朝佢哋兩個都百年歸老，咁就一個時代的終結。香港永遠都唔會再有白手興家成為富豪呢回事，絕唱。唔係話家陣啲人唔叻、唔勤力，而係成個環境俾人壟斷晒，冇得畀你發圍。不過，而家嘅環境，你唔需要係富豪，生活都可以好疏肝，分分鐘你嘅生活質素仲高過富豪，至少你可以自由自在周圍去，又唔會有人背後攻擊你話你撤資。我幾時都話，做最有錢嘅窮人最爽，最窮嘅有錢人最慘。最有錢嘅有錢人，最煩。

德銀會唔會係下一間雷曼？《金融時報》Lex column計一大輪數，話佢未死，只係臥床不起。回想8年前，2008年，Bear Stearns冧咗之後，已經有電郵傳出嚟，話下一間要冧嘅就係雷曼。當時雷曼嘅CEO都話公司無事，市場半信半疑，股價不斷下沉。大家未至於恐慌，因為Bear Stearns有人救，雷曼估計都唔會例外。

之後嘅事，大家都知，亦怕重蹈覆轍。金融機構最緊要嘅唔係賬面上嘅數字，係市場對佢嘅信心，股價就係信心嘅量化。雷曼倒閉，把所有客戶嘅資產凍結，令冇欠雷曼錢嘅都要輸。德銀無論有事定冇事，稍為有少少唔對路，醒目嘅都會把資產移離，所以上周已經有報道指對沖基金轉倉。雷曼嘅教訓，係唔好把銀紙放喺唔穩陣嘅銀行。

10月似有危險要小心

上星期五德銀似乎冇事，捱過今個星期再說。所有要倒閉要人救嘅金融機構，出事前一日都係睇唔出有問題，相反仲會有好多人話冇事。股價唔會講大話，市場最清楚如何評價德銀。雷曼之後，任何少少風吹草動，都會令人分外敏感。10月似乎相當危險，小心。

特朗普唔肯公開稅務記錄，原來分分鐘18年未畀過稅，佢話自己醒目。政治同做生意唔同，做生意醒目係必須，搞政治選舉，醒目會被扣分。政治人手握公共資源，醒目仔會令人驚你出蠱惑。特朗普又係一個唔會出錯嘅人，辯論失分係因為支咪有問題，唔關佢表現事。醒目仔坐正，香港人已經知道有幾恐怖，希望美國唔好揀個醒目仔。