仲慘過唔係真嘢 - 方卓如

2015年5月6日 - 信報

點解消費品商肯畀咁多錢搵明星做代言人？佢哋講嘅對白，其實搵邊個講都得，仲可以講得又準又好聽，樣子亦可能同樣甜美。花咁高溢價，究竟為乜？咪就係講嘅內容唔係最重要，邊個把口講先至係最sell到，你焗住貴一貴都要搵個明星去做代言人。

而家政府推政改最敗筆係乜嘢？咪就係佢哋搵啲出嚟講嘢嘅人，唔單止sell唔到，反而仲會令人抗拒。噚日，董伯出嚟話袋住先才可以唔袋一世，唔袋住先反而一世都無。嚇人，大你，本來都係一啲好常用嘅推銷手法，香港人好明白，但大前提係你唔可以俾人覺得你嚇緊人、大緊佢，要好subtle咁表達。董伯一向唔係明星，佢以前嘅豐功偉績，忘記了都如今俾佢提醒番。再加埋其他形象根深柢固當香港人儍嘅男男女女，往績鐵證如山，佢哋聯群出嚟狂sell政改，即係地產經紀話凶宅係基督徒之選，擺明就係想昆你，明明係筍盤都俾你搞衰啦。

搵錯人推銷

有人演繹調查結果為，有學識同有分析能力嘅愈傾向反對政改，我就話一半一半。有頭有面有權有勢嘅，佢哋肯走出嚟唔介意核突咁推銷政改，就算部分係身不由己，骨子裏亦有機會係佢哋經過深思熟慮，覺得邊度有咁順攤，畀你話選邊個就邊個。梗係要肯定人選夠忠誠，先會畀你出閘攞選票。佢哋自覺貼近內地脈搏，了解阿爺思維，佢哋咁撐政改，唔係受人唆擺，係理性選擇。換言之，有諗頭、有分析能力嘅，就算同樣覺得而家啲政改Sales丟晒架，亦可能係理性接受。

去到尾，政治嘅嘢，同炒股票差唔多，好多時候講感覺。理性分析好多時候會得出雞肋結果，食又唔係，唔食又唔係，吊吊揈。呢個時候，最啱就係瞇埋眼，問吓自己，有冇啲嘢令你好鬼唔舒服，硬係覺得唔對路，咁你就搵到答案。唔係一啲直覺乜乜乜嘅老土嘢，而係你見到十幾廿年嘅言行舉止，有啲嘢一出山，就自然觸動你排斥機制，感覺就係有啲唔妥。搵錯人sell嘢，仲慘過你件嘢唔係真嘢。