要搵基督徒之選 - 方卓如

2015年5月7日 - 信報

政改推銷搞唔掂，原因其實好簡單，搵錯代言人推銷之外，就係真嗰句講唔出口，又或者搵唔到個靚啲嘅包裝去講出嚟。凶宅話係基督徒之選，直情係天才兒童。佢冇呃你，講咗係乜嘢一回事，仲提醒埋邊類人唔怕，咁咪係唔呃人底下最高招嘅推銷術囉。一俾人踢爆你呃細路，咁就唔使多講，學王國興話齋，收皮。

真嗰句係乜？美國共和黨都搞緊黨內初選，入閘非常容易，但過程就一路將人篩走，最後一個政黨得番一個俾你選。

中國係一黨專政，佢黨內篩選完俾你再揀，喺阿爺眼中咪同美國差唔多。啲代言人以前都用美國黨內初選做比喻，但係言不由衷，欲語還休，關鍵就係想連自己都呃埋，唔肯講真話，梗係sell唔到啦。樓盤廣告話咗你知，隱惡揚善未必sell到，正面坦白壞消息，仲容易叫人接受。不過識點講真話嘅人，香港又有幾多個？

市盈率係最強洗腦工程

市盈率係過去幾十年最強嘅洗腦工程，令人最易找到理由去叫你買股票。但頭腦清醒嘅人應該要知道，調番轉，市盈率唔係用嚟買股票，實情係用嚟賣股票先啱。用市盈率嚟睇應該買乜嘢股票，sorry，你永遠都唔會有發達，好多升到砰砰聲嘅股票，係冇市盈率。

反而，市盈率平到你唔信嘅股票，佢可以再跌，繼續挑戰市盈率新低。你睇市盈率買股票就不如存錢入銀行，起碼輸少啲。

相反，佢幫到你諗幾時賣股票，因為全世界被市盈率洗晒腦，太高或長期負數嘅市盈率，會壓抑入市意欲。需求預期減少，呢個先係股價跌嘅原因，並唔係公司賺多賺少嘅數字本身。白啲講，冇貨嘅人，使鬼理市盈率，你買咗之後，再慢慢去睇佢市盈率都未遲。