散戶嘅終極保障 - 方卓如

2015年5月12日 - 信報

香港啲散戶投資者保障唔係咁多，唔似美國咁有class action，亦唔容許律師可以勝訴後瓜分投資者嘅賠償，要用法律去討回投資損失幾乎冇乜可能。但係香港有一種可以話係全世界獨有嘅投資者保障，保證投資者唔會血本無歸之餘，隨時仲可以反敗為勝，贏番轉頭。係乜嘢？賣殼。

冇錯，香港有賣殼呢回事，仲賣到成行成市，就係對投資者最大嘅保障。殼價係乜？就係每股嘅底價，基本嘅價錢。生意做得再差嘅公司，都唔會跌到變零，投資者都知道佢哋至少值個殼價，任何市值低過三四億嘅公司，你會見到反而喺財經版推介，原因就係有機會賣殼。全世界投資者都怕上市公司長期蝕錢，搞到佢哋嘅投資血本無歸。只有香港投資者唔怕佢哋蝕，蝕極都仲有底價，你話幾咁盞鬼。

長期蝕錢嘅公司，冇賣殼嘅機會的話，投資者嘅命運就只好睇住股價一沉不起，難聽啲就係等清盤。一盤生意走到蝕錢地步，要起死回生，反敗為勝，要Steve Jobs呢啲天才先得，但係又有幾多個呢類天才？乾手淨腳，賣殼，等高人打救，股東仲有翻身機會。點解蝕錢嘅公司有人肯買，投資者唔係傻嘅，殼價就係佢地嘅護身符。

而家邊類人最有興趣買殼？係人都知係內地人，鬼佬買殼真係一隻手數得晒。咁內地人買殼你估阿爺唔知咩？一定知。咁公開嘅事實，阿爺唔出幾號文件去禁止，就即係佢都唔反對。事實上，俾啲內地公司嚟香港買殼，繼而集資，唔單只係俾佢哋一條生路可以融資，仲可以將一啲賺到錢嘅企業浮面，學習正規經營。其他唔使講，淨係交稅就要交番足，唔可以學以前交少幾多得幾多。

散戶終極嘅保障，千祈唔好搞佢。