用高價懲罰大股東 - 方卓如

2015年5月11日 - 信報

我記得有一日，同一個政府高層食飯，佢話政府要搵人才做公職，人海茫茫，好自然惟有去啲大公司大機構，向佢哋嘅高層埋手。喺一啲大公司大機構升得上去坐高位嘅人，蠢極有限，又識得點樣跟大隊，搵佢哋實冇死。打工打到高位是否就係叻仔，喺呢方面隱形金主有佢獨特嘅睇法。試過有個投行高層搵佢合作，大家都出錢出力。

俾人掃場　大股東最慘

隱形金主逐步套現全身而退，反而投行高層蝕到趴街。隱形金主嘅結論係，大公司高層只係出色嘅survivors，可以喺內部競爭激烈嘅環境生存，喺外邊嘅殘酷世界係冇戰鬥力。

情形就好似動物園養慣嘅熊貓，放出野外就生存唔到，所以唔好迷信卡片，攞住張大公司高職卡片嘅，唔一定叻過你。

恩達（01480）瞬間變身紅底股，升三倍再大跌八成，你以為係散貨？你以為散戶接貨好慘？你以為大股東今次肥仔水？錯，大股東先係受害者，今次係俾人狠狠地教訓一頓。去到100蚊一股，你知唔知一手要幾多錢？20萬。

唔會有散戶肯用20萬買一手股票，就算係騰訊（00700）都咁話。50蚊都要10萬銀一手，相信50蚊樓上都唔會有散戶敢買，反而唔小心有貨在手嘅散戶，今次仲可以乘機超高價沽貨，千載難逢。

推到一個冇人肯買嘅價，點會係散貨？相反，搞到人人以後冇得散貨。

恩達成了財經版頭條，全世界都知佢啲股價咁郁法有問題，仲邊有人肯買？有力人士就係要做到升三倍跌八成，話畀全世界特別係大股東知，貨源盡在強者之手，要佢升就升、跌就跌。大股東未過禁售期，股票唔郁得，好可能係得罪人，或者有嘢應承咗人唔兌現，俾人掃場。要懲罰上市公司，唔一定要推冧股價，踢高股價到天咁高，撻番落嚟傷得仲重。