工作就係開會 - 方卓如

2015年5月15日 - 信報

近期，最潮最多人大開眼界希望模仿的，應該係唔使開會嘅CEO。每個人，無論打工好、老闆好，總有啲時間要開下會。同客、同下屬、同老細，你點都要同人交流吓、傾幾句啩？坐定定喺間房，好難淨係講幾句正經嘢就散水走人，一定夾雜住啲廢話。啲人唔鍾意開會，就係覺得呢啲廢話嘥時間，開會人愈多，廢話按比例增加，就算係正經事，一人一句，正經話都變咗廢話。唔鍾意開會，覺得開會浪費時間，係好正常嘅。

拍檔傾合作不輕鬆

但係如果你想做金融界最高級嘅工作，開會就係你日常生活一部分，唔到你唔開。傾deal唔開會，點傾？呢啲會有別於公司內部為開而開嘅會，全部在座人士都是有目的而來，目標非常清晰，廢話少講。呢啲會就真係角力場所，盡顯真功夫。唔一定係談判式零和遊戲，可以係傾合作，大家win win。

大家坐埋一條船嘅，你唔係諗點樣賺盡佢，係諗點同佢一齊搵街外錢，點樣同佢分得勻。唔好以為唔使爾虞我詐就輕鬆好多，要諗條橋賺到街外錢，分得勻大家冇拗撬，兼且可以繼續長做長有，好難。做對手可能係一次過，搵完佢笨以後唔見。拍檔嘅嘢，人心會變。上次得嘅，下次可能唔得。要照顧拍檔不斷進步嘅要求，唔容易。基本心態係，只要計自己嗰份，滿意就得，千祈唔好眼紅隔離。永遠唔滿足嘅話，辛苦嘅係自己。

做deal開會，講嘅說話係一回事，但係成個過程都係傳達緊message。去邊度開會、點坐、時間幾長、要唔要佢等、講到邊就暫停、食唔食飯直落……統統都係傾deal嘅一部分，唔只係開口說話嗰一part。有啲人好叻，有啲人搞唔掂，關鍵除咗係你見得多唔多之外，係你識唔識做人，夠唔夠細心，都好大分別。開會開得叻嘅人，佢個人本身就一定要係叻人。同啲廢人開會，個會自然廢。