生活喺預期之中 - 方卓如

2016年10月21日 - 信報

巴塞對曼城，曼城就係輸喺哥帥手下。佢唔畀隊員大腳踢，一定要傳畀隊友，所以龍門出迎都唔敢大腳，細細力傳咗畀對手，繼而後防又唔敢大腳解圍，寧願細細力後傳，又傳咗畀對手。兩球細細力就輸咗兩球。

巴塞嘅踢法要有班巴塞球員先靈，換咗拜仁同曼城，威力大減，仲自暴其短。兩星期後曼城再對巴塞，準備捱眼瞓。

星期四晚個個出晒街，當正星期五，因為全部預計今日唔使返工。萬一估錯，又或者天文台收到政治任務，要香港星期五繼續開市，我肯定今朝特別多人告病假。人類要生活喺預期之中，萬一預期落空，會生活大亂。

大冧遲早會嚟

例如大多數人預期市場會有一次大冧，銀紙係等候撲出嚟執平貨。當大冧遲遲唔出現，有人按捺不住要走出來買嘢，以免愈遲買愈貴，冇定力嘅人將來會輸得好慘。大冧係必然，唔只因為全世界脆弱到不堪一擊，而係每10年總有一次大冧，符合某部分人利益。

普通人要市場向上才有錢贏，但另一部分人，上同落都可以賺錢。當市場向上唔可以帶來利潤，自然想令市場向下。冇錯，想向下嘅人心地的確唔好，但財富轉移全靠殺上殺落，每次大冧係會令富者愈富。呢啲場面過去每10年總有一次，嚟緊嘅一次早晚來臨。

不過，呢啲場面唔係永恒，去到某個境界，貧者貧到一無所有，人數眾多，自然會同有錢人反面，世界大亂，然後洗牌再嚟過。英國脫歐、羅馬選出五星市長，都係呢類反面嘅文明表演。他朝用唔文明嘅方法反面，你點有錢都冇用。

又例如，香港人一向預期自己生活喺有制度、守規矩嘅地方，愈嚟愈知道自己錯。傳媒而家唔只有政治任務，仲唔介意造假、改圖屈人、生安白造，愈來愈放肆，幾冇規矩。要置政敵於死地，唔再依規矩，靠惡，郁你就郁你。迂腐嘅人由細到大被洗腦要循規蹈矩嘅，唔該你企後一步，政治唔啱你。未準備好要諗多幾步估計對手點行嘅，唔該企埋一邊，政治都唔啱你。

小心，社會同你預期唔一樣，以前搞政治仲可以落台後優雅地生活，而家冇呢支歌仔唱，搞政治要付出沉重代價，你企邊邊都要找數，只係代價有高有低。