唔要真相只要似模似樣 - 方卓如

2016年9月20日 - 信報

iPhone 7同iPhone 6分別唔大，但的確有分別。Home鍵變成MacBook嘅同樣感覺，有啲奇怪；鏡頭靚咗，不過你都係當佢儍瓜機咁用，亦只會喺手機睇相；冇咗耳機插頭，焗你將來用無線耳機，但係你平時聽歌又唔會太大影響。總結一句，iPhone 7冇一樣令你唔換唔得嘅理由，但係你會換機，因為而家手機預期壽命只有兩年，兩年下來手機跌過無數次，刮花、入水、電池折壽，呢啲先係你換機嘅理由。而家做生意，唔係要做得更好令顧客繼續畀生意你做，而係要上手做得較差，顧客頂唔順，逼住要畀生意你做。你嘅首要任務唔係提供完美產品，而係製造一個走唔甩嘅環境，令顧客留喺你身邊。唔適應呢種生意模式嘅，儍更更諗住做到完美自然有生意嘅，隨時被時代淘汰。

讓特首試吓post-truth世界

梁特嘅橫洲事件，開始令人發覺環保朱口中嘅「官商鄉黑」開始慢慢現形，全靠嚇佢要佢收聲嘅人，因為環保朱當選唔足以令香港人關心「官商鄉黑」，橫洲呢處地方隨時聽都未聽過。但而家，家家戶戶都知道橫洲唔係咁簡單。政治事件好多嘢係事前預計唔到，亦冇得精確計算。希拉莉無端端肺炎，或者其他不知名病發，隨時就係咁就病走個總統寶座。橫洲本來唔入屋，城市人唔關心新界啲地點用。到而家發覺利益原來大到要攞人命，再印證之前咁多金毛口罩人支持梁特，成件事就好合情合理，真相活靈活現。

《經濟學人》話而家係post-truth嘅世界，政客要推銷嘅唔係事實嘅真相，而係附帶事實嘅似模似樣。而家真相唔一定要客觀存在，可以係主觀投射。橫洲是否真實嘅「官商鄉黑」勾結，開始變得唔重要。最重要嘅係，橫洲唔少個別人士得益，大部分人受害嘅事實，有官黑同場出現嘅過往事實，有齊全香港人都願意相信嘅主觀投射。喺post-truth嘅世界，過去4年幾乎每日都在香港出現，次次由梁特推銷post-truth。香港人俾梁特玩得多，今次到佢試吓post-truth嘅後果。

就好似《屍殺列車》，嗰個每次推人去死，去俾喪屍咬嘅大叔，最終都係因喪屍而命喪。