搵唔到長揸嘅理由 - 方卓如

2016年9月19日 - 信報

報載有股民買入騰訊（00700）上市時股份持有至今，升值幾百倍。究竟買股唔放，同買股票出出入入，邊樣賺得多？

呢條問題其實好易答，因為答案建基於你可以望番以前，而家騰訊二百蚊，你梗係話長揸先會發達，但係騰訊幾蚊嘅時候，冇人會咁講。除咗少數有如受訪街坊之外，冇人夠定力長揸，包括騰訊高層，高層自己都有減持。

高層減持並非因為等錢使，無人等錢使到要套現百幾億，沽貨就係因為覺得今日沽好過明日沽，係覺得今日夠貴。連高層都會沽貨嘅，街坊唔知發生乜嘢事嘅，點解要長揸？

唔會再有翻版騰訊

所以，條問題嘅答案係，睇你運氣好定唔好。你好彩嘅，買中騰訊，梗係唔好沽。運氣唔好嘅，買咗漢能（00566），唔沽就等變牆紙。

牆紙股在變成牆紙之前，通常都有段好似騰訊咁嘅係威係勢，只不過佢無騰訊咁多話題同可塑性。

如果騰訊一直都係QQ，相信長揸嘅街坊唔會有報紙走去訪問。但係你申請認講騰訊嘅時候，係唔會知道佢將來唔只有QQ，都有腦去諗好多新搞作。時空轉換，有腦嘅你係搵唔到長揸騰訊嘅理由，連高層都搵唔到。你長揸發咗，必須承認，你好彩。

望轉頭係冇前途，望前面先有發達。今日仲有冇隻未來騰訊畀你買？我肯定冇，唔會再有一隻明日之星可以食正一個新經濟嘅浪，同埋有政府大力扶持，養肥你，換取你千依百順，聽聽話話，幫手監視人民。

既然下一隻騰訊唔存在，篇首嘅答案就好簡單：唔到你唔出出入入，因為大部分嘅股要同大部分政府債券都一樣，長揸到尾都係負回報，始終有日你要落車。

當上星期美國突然有機會9月加息，全世界負回報嘅政府債券即時數目大減，證明負回報嘅債券係儲存過多現金嘅成本，市場有動靜或發生說好的大爆煲嘅時候，醒目仔就叻唔切，沽債券換錢，要早過其他人拋售套現。

資產價格現在處於大家拔槍互指階段，一有人唔生性掹雞走火，大家就一鑊熟。美國聯儲局由唔同人出聲試陣，原來唔開槍但係開口「砰」一聲，都足以有兩件瞓低，寫包單，9月係唔敢加息。