肥肥飽飽等死 - 方卓如

2016年9月14日 - 信報

我老友岸信介貴為上岸分子，沒有因為唔使憂柴憂米而終日無所事事，依然願意腦筋急轉彎諗啲新嘢搞，算係一個有前途嘅人才。佢搞嘅生意，要揼本，唔太犯本；會輸凸，但以佢今時今日同識得嘅朋友，點衰都應該可以埋單攞番本。世上雖然冇穩賺不賠嘅生意，但係有可以止血嘅生意，肯動腦筋，依然存在。

身在福中不知福係人類通病，佢講完公司裝修苦況之後，就會怨自己點解唔係自己個仔，老豆有錢唔使do，攤大手板就有飯食。岸信介係經過血的洗禮，先有今天嘅好日子。捱過窮，時來運到先有上岸呢一日。佢身邊都有唔少有錢人，見得多，自然比較到自己捱嘅鹹苦，好多人係毋須經歷。

追求過程令人羨慕

如果佢係真心埋怨唔係自己個仔，我早就同佢絕交，可幸佢都係經歷過風浪，知道乜嘢先係歷久常新，乜嘢係過眼雲煙。佢知道，老豆大把其實唔係福氣，反而令你享受唔到人生最大嘅快感。讀過書嘅就知，求不得固然痛苦，唾手可得更加令人空虛迷惘。失而復得令人喜悅，求之不得最後欣然獲得先最令人興奮。岸信介可以由冇到戰戰兢兢到有，呢個過程真係連有錢仔都羨慕佢，好似𡃁仔嘅時候扭計要買玩具，要自己儲好耐錢先買到，一定高興過喊兩聲老豆就即刻買畀你。

有錢人個仔先最煩，每日要做嘅就係望個老豆幾時死，淨係做一個想老豆死嘅仔已經夠無癮。第二就係你做乜個老豆都睇唔順眼，覺得你一係嘥時間，一係嘥佢啲錢。最慘係，你要有作為，先發覺找尋動力原來係咁艱難。一般人為口奔馳，奔奔吓變成略有成就，繼而發展成一項顯赫事業，做大事可能只係從為求一小碗飯開始。冇咗搵食呢種原始動力，你可能未必知，做任何事都變得唔夠起勁，至少冇咗一股狠勁，一去不成暫不返。所以Steve Jobs講得啱， stay hungry，日日都肥肥飽飽，就坐喺度等死。