正義通貨膨脹期 - 方卓如

2016年9月9日 - 信報

「方帥，而家幾恐怖喎，連準議員都冇面畀，搞到佢覺得自己有生命危險。佢係票王，全香港都識佢，有乜冬瓜豆腐，實要交個人出嚟坐十碌八碌。你估乜嘢人咁沙卜，買棺材唔知埞？」

「草蜢仔，你冇睇《城寨英雄》咩？直情係而家社會縮影啦。香港咪好似城寨一樣，冇晒王法，邊個拳頭硬邊個話事。最惡咪就係喺城寨入面有利益關係嘅同鄉會囉，要打你就打你。居民要自保，咪惟有團結一齊編更表，守住條街喉，守得幾耐得幾耐。

文弱書生　惡人落重藥

「不過，唔好忘記，出力守住城寨嘅，最後都死得七七八八，剩低嘅街坊就安居樂業，笑笑口，好快唔記得邊個死鬼咗。為香港仆心仆命嘅人唔少，咁多年前仆後繼，通常你只係記得最後嗰個，前面嗰班你已經唔記得咗。搞大佢非常正確，唔係要啲惡人知難而退，係要佢重手咗攞咗人命之後，警察都唔會求奇銷案算數，總要捉番個人出嚟踎監填命。」

「唔係咁得人驚啩方帥，攞命咁大鑊？」

「盜亦有盜，尋常追債係唔會攞人命，嚇吓你總會有，好人好姐俾人兇幾兇，點都有啲驚。但係牽涉自身重大利益，斷人財路，人就會兇狠好多，猶如殺父仇人。見人文弱書生奀挑鬼命，仲唔落重藥？怕就怕拳頭冇眼，好似丁蟹打儍方俊生一樣。呢個比喻大部分人都明，只有張華峰議員唔明，佢話要了解吓丁蟹係做盛行。」

「伸張正義搞到命都冇，呢度仲係香港？」

「通常伸張正義都有代價，只係香港以前太多免費正義，畀你一邊爭取民主一邊飲紅酒。你睇吓斯諾登、阿桑奇、昂山素姬？佢哋付出什麼代價？吃盡免費正義嘅上一代已經喺今次立法會選舉全部被清洗，新入局嘅全部係付出不同代價嘅下一代。佢哋爭取公義係同國際接軌，每次行動都有血有汗。而家正式進入正義通貨膨脹期，做一件你認為啱、認為係公義嘅事情，成本愈嚟愈貴。值唔值得，見仁見智，正如400萬買間劏房樓，有人都覺得值。從今開始，伸張正義要有心理準備，要做，就有代價。我哋可以做嘅，就好似成班人一圍枱飲完茶埋單，大家分擔一啲。」