Out得快過iPhone - 方卓如

2016年9月13日 - 信報

內地保險公司可以買港股，升400點。美國9月有機會加息，跌800點。證明量化寬鬆告一段落，威力係大過「滬港通」一日最多百幾億嘅港股淨流入。如果全球收水，內地保險公司都只係接貴貨，係唔足以成為大市上升動力。

我之前講過，大時代之前，港股最高大致到二萬五千點就掉頭，脫歐公投後港股未停過，一條氣可以升到二萬五？過去兩個月，港股上升嘅藉口只有一個，就係北水。而上升唯一最實際嘅行動，就係回購。而家藉口同實際行動都用到技窮，掉轉向下變成更易賺錢。唔好忘記，掌握市場嘅人士，升市跌市都有錢賺，只有你先至會寄望市升唔好市跌。來一次大冧，絕對符合市場人士利益，唔需要奇怪。

9年完成高峰期

蘋果公布iPhone 7之後，蘋果設備股失去上升動力，掉頭向下。有理由相信，iPhone唔會再令設備股有驚人增長。

iPhone在9年前面世，自從一年一個新號碼，變成兩年先有一個新號碼，手機本身已經發展到盡頭， 連鏡頭都唔再能夠貼近機背，要稍為突出，證明機械物理都有極限，唔係咁易再破舊立新。蘋果開始出package讓你年年換新機，表示佢哋都唔相信用家必然會換機，要用財務安排去引你使錢。每個時期都會有啲令人有驚喜嘅產品出現，智能電話已經係日常用品，唔再帶來驚喜，前後只係用了9年時間，而好多人嘅iPhone用家齡都只有6、7年。幾年 就完成一件產品嘅高峰期，令做生意嘅人行慢一步都變成古董，太恐怖。

9年之後，我相信香港已經再無香港人做金融嘅前枱位置，全部都只係好似活希兒做金融行業嘅合規部門，頂多做埋中間嘅交收工序。

香港人喺香港，在鬼佬行嘅時代，要浸過鹹水扮鬼混入佢哋嘅圈子，而因為懂得中文，所以可以喺前枱霸到一個位置。

而家係大陸人嘅時代，你扮唔到大陸人混入圈子，兼且唔識得佢哋嘅中文，佢哋自己又識得英文， 再諗唔到乜嘢原因要受你哋玩。

香港人100年來都搵到自己生存嘅方法，但係未來9年點樣先可以繼續生存，唔係好多人得閒去諗。股市畀你嘅教訓係，北水唔可以養你一世，世界一個大浪冚埋嚟你都要冚旗。當你玩緊部iPhone時，用吓腦，你都唔想自己out得快過佢。