上癮嘅都要戒 - 方卓如

2016年8月30日 - 信報

立法會選舉，今屆有最多年輕人參選，亦係最少有頭有面嘅人參選，點解？

2004年係七一後嘅選舉，當年係中產參政，貼地中產覺得唔對路，原來唔出聲嘅話隨時連命都冇，所以走出嚟參政。12年之後，中產變得離地，學生先係最貼地。

以前中產參政有成本，成本在於搵少咗，大律師參選大概個個都必定收入大減。12年後學生參政，成本更大，分分鐘連命都冇，保得命嘅可能要坐監，就算唔使坐監，前途隨時比坐過監更慘，冇人肯請，冇工做。

面對咁嘅成本，年輕人參政最好有充分準備，千祈唔好後悔。

有頭有面唔肯選

中產係做咗十幾年嘢嘅大學生，稜角磨得七七八八，懂計數，錫身。

12年前肯拋個身出嚟，係計完數之後覺得蝕極有限，可以放手一博。12年後，只有學生夠薑企出嚟，連做咗十幾年有頭有面嘅，而家都寧願抬轎都唔出面，證明而家嘅成本高到你唔信。有頭有面嘅唔肯選，呢個現象，比起年輕人踴躍參選，更加值得研究。

冇咗呢啲有頭有面嘅，香港其實仲慘。立法會唔使旨意佢可以做到任何嘢，睇實政府唔到佢，監察政府使錢如同虛設，要拖垮政府惡法，下屆大概連拉布都做唔到。掉番轉，如果有啲有頭有面嘅，見到政府欺人太甚，辭職唔撈又好，出嚟講句公道說話又好，起碼有一點點警醒作用。成個立法會都係扯線公仔、人頭、熱血年輕人，有事唔知仲可以搵邊個出頭。

有頭有面嘅全面撤退，證明下屆立法會係全面廢除武功，唔再有任何功能。有頭有面嘅都唔想同你癲，呢樣先係令人最沮喪。

權力可以令人上癮，連上咗癮嘅人都決心戒癮，你唔驚？