經濟好個巿先冧 - 方卓如

2015年4月23日 - 信報

大時代，大市升到咁高，啲人就會問，幾時冧。其實呢條問題好易答啫，你知道答案之後，更加放心衝入去買。

冧市通常都係event driven，一定係有啲事件將個市推冧。

錢多而推動嘅市況，佢無端端唔會大冧；一跌，總會有人買番，資金總要找尋出路。所以你見美股升完之後上上落落橫行，你賺完沽貨，畀我接再坐，等下一個再接。

知會冧　但唔知冧幾多

財富轉來轉去，大市一直成交一直上落。同賭錢唔同，冇人股票賺完錢之後從此金盆洗手永遠離場，一定將贏咗嗰啲加碼再投入嚟過。股票係mark to market，價錢上升唔使不斷有新資金入市，同一批錢轉來轉去都可以推高市價。

既然個市唔冧係常態，要推冧就一定要非常態。呢啲非常態事件，唔會靜雞雞，你一定知道，分別在於你睇得中唔中佢冧幾多。你唔會敗於市冧，只會死於唔信佢冧到崩盤。但係而家全球股市身負救國任務，唔會有國家夠膽睇住市冧而唔出手托。尤其是而家全世界學識股市救經濟，冧市等於經濟衰退。

所以，你要見到冧市，除非經濟一片繁榮，否則唔會出現。奇怪嘛？以前經濟好，股市先至好；而家相反，經濟差，股市就要好；經濟好，股市才有資格冧。世界唔同晒喇。

政改方案，連學者諗爆頭，話白票「守尾門」都冇，白票即係廢票，話之你香港人點咁睇唔上眼，總之兩隻怪獸出選都總有個會選贏，係唔畀所有大大聲話會反對嘅議員有退路。轉軚支持嘅即死，企硬反對嘅，下年先揭盅死定唔死。

今日已經係下屆立法會選戰嘅開始，要連任或者要挑戰嘅，戰場set好咗，除低件西裝落場就打。