贏錢都會唔開心 - 方卓如

2015年4月24日 - 信報

嘩，你睇吓《大時代》？嗰陣時啲電視劇，仲可以有交易所人馬踏踏，餐廳坐滿十枱的臨記爆棚場面。而家啲電視劇，來來去去幾條友行嚟行去做晒，等如舞台劇。難怪而家啲電視劇冇人睇冇人講，重播嗰套反而仲上頭條。

Serendipity 如果要我譯，文雅啲就叫命運之手，接地氣啲、地道啲，梗係叫神推鬼㧬。當你能夠睇得通呢個世界好多嘢都唔係你話晒事，搵錢又好，識女仔又好，全部都係神推鬼㧬質畀你，咁代表乜嘢？咁代表你老，經歷晒所有起起跌跌，明白好多嘢都係整定。

4月好多人唔開心

4月唔開心嘅人一定多過開心嘅。贏錢嘅，會嫌自己贏得少，贏得唔夠盡，太早放。輸錢嘅唔使講，咁嘅市都輸，你絕對應該唔開心。狂牛市最需要嘅唔係技術，唔係運氣（買乜都贏，使鬼運氣？），係心理質素，唔好搞到贏錢都唔開心，否則好易做錯事，喺唔適當嘅時候瞓身輸番轉頭。記住，你贏錢都係神推鬼㧬，唔係你叻，唔好嫌贏得少。

好多人喺4月已經賺夠幾年使費，真係可以用唔少時間諗吓點樣使錢，實體經濟咪就係咁樣帶動囉。

未完㗎，5、6月仲陸續有嚟，之後就真係要講技術。記住呢個世界往往係神推鬼㧬，平和啲，humble啲，唔好愈贏愈憋悶。

最講serendipity嘅運動，係帆船。全程要睇風，你叻都冇用。望住個大海，幾米浪，嘔到七彩，你有幾多錢都冇分別。喺個海你check唔到WeChat，睇唔到個市，只係集中鬥快埋岸。這時候你最清楚，神推鬼㧬，你行得快行得慢，要睇有冇風俾你食正。玩船最叻嗰啲都有咁上下年紀，唔係因為年紀大，先可以afford到時間金錢，係因為有咁上下年紀先領略到serendipity，有風食風，冇風吹水。練到咁嘅境界，你喺海度捱得到，喺狂牛市又瞓得着。