牛津求財 - 左丁山

2010年09月27日 - 蘋果

前一排，香港最後一任總督彭定康以牛津大學校監身份來港，主要目的係為咗籌款。肥彭係牛津校友，今日係牛津校監，為母校籌款，特別落力，佢未到港之前一個月多啲，牛津大學聘請駐港校友聯絡總監，有人叫過左丁山推薦一兩位去應徵，知情人士講明，牛津校友當然最好，但其他大學嘅畢業生，亦歡迎應徵，剛離任嗰位總監，都唔係牛津校友啫，之不過，英文一定要好好噃。咁又係，英文唔好，如何應付彭定康及貝理雅呢啲頂班校友？之不過，一位英文極好嘅七十後話佢自己唔係牛津生，唔好意思去應徵，於是作罷。肥彭來港密訪本地富豪，當然係想搵人捐款啫，之後又去咗北京，目的相同，所以話現代一流大學，經常為經費傷腦筋，校監、校長嘅一個主要職務，就係向外籌款，向校友籌款，只有香港一啲不食人間煙火，未見過世面，或者扮純情嘅評論員，會指責富豪捐款畀大學係為咗沽名釣譽，指責大學市儈向富豪乞錢。

官辦大學，唔向私人籌款嘅話，錢從何來？牛津、劍橋係英國大學之寶，因英國政府有好大財政困難，大削大學撥款，削 25%至 40%之間，如果香港咁樣做，你話唔嘈到坼天先至奇。正是憶苦思甜，香港八大院校得到嘅政府撥款，十分穩定，大學師生應該感到好運。

哈佛有一間Kennedy School of Government培訓全球政治突出人物，歷史悠久，現在牛津又話要開一間政治學院，搵到一位美國富豪Leonard Blavatnik捐款七千五百萬鎊（約九億零七百萬港元）未夠十億，牛津斥資二千六百萬鎊，成立以呢位富豪為名嘅Blavatnik School of Government，一於同哈佛爭過，嗱嗱，牛津校友唔會好似一啲港大校友咁樣嚟痛駡噃，英國亦無思維不清嘅評論員痛駡Blavatnik噃。呢位俄羅斯裔富豪，自莫斯科大學畢業（照內地一啲網民思維，抵鬧，點解唔捐畀母校，竟然捐俾牛津，係俄奸），1957年生，哥倫比亞大學電腦碩士，哈佛MBA，1978年移民美國，86年回俄投資，靠俄羅斯石油發大財，現居於紐約及倫敦Kensington Palace Gardens，屬於二十年來新發財一類。牛津係九百年名牌老店，比慶祝一百歲嘅港大威猛得多，竟然接受俄羅斯新發財富豪嘅捐款，以學院冠名回報之，騎騎，冇牛津校友鬧嘅？