文革徹底錯誤 - 左丁山

2011年01月21日 - 蘋果

陶傑前一排講及民國一百年，感慨言之，一啲大學問家於一九四九年或以前，誤信「新中國」之說，或留戀學園，不願赴臺或逃難來港，於是後來受到清算迫害，誤了一生，最好景嘅，都在學術貢獻方面，打了幾折。好彩，當年還有錢穆，唐君毅，牟宗三，張丕介，饒宗頤，陳湛銓，高明，馮康侯等等來了香港，錢唐牟饒四位大師嘅重要著作都係在香港或臺灣完成嘅，如果佢哋當年如陳寅恪留在大陸，命運會完全不同。

今年係《明報月刊》創刊四十五年，有大塊文章，余英時先生有長文談及陳寅恪（1880~1969）研究，左丁山唔係文史學家，對陳寅恪先生只聞其大名，深入認識缺如。據《明報月刊》之陳寅恪簡介，內有一段小史十分令人感慨，就係陳先生一生治學秉承持「獨立之精神，自由之思想」，1953年佢寫信答覆中國科學院，提出就任歷史研究所第二所長之兩個條件：第一條，「允許中古史研究不宗奉馬列主義，並不學習政治。」第二條：「請毛公（澤東）或劉公（劉少奇）給一允許證明書，以作擋箭牌。」中共中央當然當陳寅恪係儍嘅，於是佢做唔成所長，在文革時期，遭受迫害，淒涼地死於一九六九，一代國學大師落得如此收場，慘也！原來一九四九年陳大師曾有遷居香港之意，又有傅斯年向臺灣省警務處講述「陳先生自廣州攜眷來台工作」之計劃，可惜不知何故，兩樣都冇做得成，一子錯，滿盤皆落索。

文革害死幾多人，至今未有定論，中共中央黨史研究室編寫「中國共產黨史」第二卷（1949-1978），確認1959-1961年大躍進期間，大陸饑荒死咗一千多萬人。但稱之為「三年自然災害」，而對文革就徹底否定，指文革完全沒有任何進步的意義，毛澤東發動文革，係左傾錯誤，不符合馬列，不符合中國實際，令到黨、國家和人民蒙受慘重損失。唉，慘慘慘，當年點解冇人夠膽對毛澤東講「左傾錯誤」，不符馬列？或有人敢嘅，鬥死晒囉，學者大師如陳寅恪等就成為無辜犧牲者。