考試有作用 - 左丁山

2011年01月09日 - 蘋果

漂亮祖母F與馬主N等人搵埋左丁山到陸羽飲茶，講番香港傷殘運動員在亞殘會中之出色表現，仍然興奮。祖母F其實以前係公關界行尊，已經退休，養尊處優，做咗祖母仍然活力十足，見到個孫就快樂上腦，令人羨慕。

呢日問佢某某人娶咗一位以前藝員，不知近況如何，F姐嘆一聲話：「唔敢問人，點知離咗婚未呀？」何出此言？F姐話佢每年都會同班小學同學飲茶，人數不多，但成班女士自細玩到大，百無禁忌，開口就問最近邊個離咗婚，答Yes嘅人居然有所增加，令佢有啲感慨，當然亦感到人生何求，要咁多錢做乜，所以佢退休前與後都做義工，覺得生活更有滿足感。

今天還可與小學一年班同學飲茶，難得到極，左丁山已經完全唔記得小學一年班有乜同學咯，當然，F姐自幼入讀名女校，同學有向心力，容易維繫，而左丁山讀義學出身，好多學生根本因家境問題而輟學，小時候已各散東西，點會有聯絡吖。

同我地一齊飲茶嘅總幹事M講番，佢與一班徙置區學校同學，因考升中試成績優異，十幾人一齊入咗男拔萃，受到優良教育，再入大學，因而成材，但今日因為分區派位，即使男拔萃唔係變成直資，呢條晉身之路亦已斷絕。

諗深一層，何以一啲名校要變成直資？最大原因係佢地要取回選擇優秀學生嘅權利。何以冇權？因為取消晒升中試之後，所有學校只能在校網區內收到學生，上水優異生冇機會入旺角男拔萃。因派入名校之本區優異生唔夠多，後來演變成為直資，不參與分區派位，可向全港優秀學生招手，恢復以前有升中試時代嘅局面。但變成直資學校之後，冇升中試成績配合，收生要睇原校成績之外，仲要面試，睇埋其他因素（例如校友、教友、父母曾否捐款），慢慢就將清貧優秀學生拒諸門外，非社會之福也。

取消升中試係教育界極力主張嘅，但冇咗升中試之後三十年，呢個社會是否變得更公平？錢穆先生以歷史眼光睇中國科舉，指出千年考試制度為中國人社會嘅平等有好大貢獻，窮苦讀書人可憑考試晉身進士，有機會成為朝廷大官，相反歐洲嘅宮廷政府機關，階級森嚴，窮人難有機會。批評考試制度，若純以學生壓力角度出發，可能係只見樹木，不見森林。