教育死結 vs. 家長心結 - 左丁山

2011年02月18日 - 蘋果

一位讀者李來信慨嘆本港教育有死結，解不開，叫左丁山講吓，有乜死結呢？讀者李話居處附近有一位小朋友在慈幼讀中一，書包內塞滿課本與作業，重到幾乎孭唔起，這是死結之一。呢位中一生放聖誕假十日，中英數三科功課習作繁多，要每日做功課，想話出外旅行三至五日都唔得，讀者李搵校長投訴，校長話老師為了學生好，擔心學生在假期玩到忘形而忘記學習喎，這是死結之二。

讀者李大概唔贊同耶魯教授Amy Chua（蔡美兒）的「Tiger Mom」（老虎媽媽）說。此說一出，美國家長為之轟動，引起熱烈討論，讀者李不妨參考二月十四日信報雷鼎鳴教授之從「虎媽的戰歌」談中美教育模式，便知美國啲名牌中學及名牌大學嘅功課多得厲害，要求學生每星期讀書做習作七八十小時，但另一方面，亦請睇埋《華爾街日報》（二月十五日）第十版一篇稿─"Now College is the Break"，文章指今天之美國大學即使不是鼓勵懶惰，亦係容忍學生懶惰嘅地方！香港學校多數驚死學生得閒，一於要學生做功課做到疲勞為止，呢個做法與蔡美兒之老虎媽媽行為相當一致。

小YY讀中一之時，功課甚少，讀書好輕鬆，但有一次學校召開家長會，一眾家長竟然齊齊炮轟學校功課太少，驚住程度唔高，追唔上其他學校，只有小YY嘅媽媽讚好，企在校長一邊。演變到後來，現在呢間中學已不是特別學校，已變身成為一間文法中學，與其他中學無異，故此香港家長睇來係鍾意學生多做功課嘅，香港教育並無死結！讀者李可能係少數份子。有甚麼樣子的家長，就有甚麼樣子的學校模式，否則學校會「被殺校」，校長與老師齊齊失業o架。

一位三十出頭嘅媽媽，送女兒入九龍塘讀一間英文幼稚園，呢間學校又貴又難入，功課甚多，居然話送學生去深圳參加劍橋大學幼兒英文試，左丁山聽到為之嚇親，駛唔駛咁巴閉呀？原來深圳「先進過香港」，劍橋不在香港辦呢個試，但深圳就有噃，幼稚園話要收千千聲（銀紙）先至訓練學童上深圳，如無市場，焉會敢做？讀者李呀，香港教育冇死結，只係家長有心結！