高哥利唔恨上位 - 左丁山

2010年11月23日 - 蘋果

美國人賓架Ｋ因在銀行工作四十年，退休後復出做合規工作，話明做幾耐都得，唔驚炒魷魚，佢又鍾意做噃，唔嫌辛苦。與佢拜拜之後，自太古廣場行到滙豐總行對面，碰到過往十年不做事嘅前記者Ｔ小姐，問佢：「近況如何呀？肯做工未？」記者Ｔ咪咪笑：「我做番記者嘞，負責法庭新聞。」左丁山不禁奇怪，前幾年見過佢一次，佢話唔做事去讀法律嘅噃，點解唔轉行做律師呢？記者Ｔ話：「我讀完法律啦，攞咗LLB，LLM（法律學士，法律碩士），但又唔想做律師咁辛苦，咪又做番記者囉。」哎吔，在中環做律師唔好咩，賺錢多，着靚衫，在歷山大廈，太子大廈，置地廣場返工，好醒目啫。記者Ｔ話：「我唔恨錢，唔多使錢，十年唔做工都餓唔死（因為之前嘅十年佢死慳死抵之故），點解要在中環打拼咁辛苦呀，做記者舒服好多！又唔使扮靚噃！」

有咁灑脫咁高哥利嘅人肯做記者，又唔計較人工，真報館之幸也。今天之女士好有性格，讀書多而唔恨上位，數吓手指，已有三位世姪女律師結婚之後就辭職離開歷山、太子，與怡和大廈，一位哈佛MBA回家湊仔，唔做ibank，另外世姪Ｍ上星期結婚，太太係四大會計師行之一嘅會計師，婚後可能辭工喎，唔怪得一位女強人曾好感慨咁對佢嘅千金講：「女仔讀幾多書都好，最好都係婚姻愉快！」

女士唔好鬧左丁山政治不正確呀，只係講一啲現實事件啫。記者小Ｇ嫁人之後，久唔久就呻人工少，但傳媒呢行人工唔會高得去邊，要高啲人工，唔該轉行。記者Ｇ呢個星期就好羨慕香港嘅國泰員工有雙糧、花紅兼明年加薪百分之四至四點五，猛話：「人地就開心啦！」唔係噃，佢都知道國泰一啲員工話考慮在聖誕節搞罷工，要求加薪百分之七，人心係冇厭足嘅。記者Ｇ話：「我表姐在三藩市加入咗國泰做空姐，唔知有冇人工加呢？佢話做得幾開心o架，幾年前冇乜美國人申請入國泰，我表姐就入咗去，佢話家喺三藩市冇乜工做，國泰請人嘅話，靚女排晒長龍，表姐幾慶幸自己行得快。」