無樓不嫁 - 左丁山

2010年10月29日 - 蘋果

運輸與房屋局局長鄭汝樺出席青年協會安排嘅「與青年人對話」，有四百三十名大學生、中學生出席，唔知有幾多人發問，但所有報紙都捉住一個「頭條問題」嚟報導，就係《明報》講及一位中文大學國際貿易及中國企業課程一年級新生王俊堯。一年班新生嘅標準年齡係十九歲，家啲學生大概好早熟，已經談婚論嫁，應該係中學時期已經拍緊拖嘅嘞。呢位王同學話：「我女朋友早前跟我說：『你買不到樓我不嫁你』，我不知怎樣做……」（《明報》十月二十四日 A1版）

十八九歲少女已經要講「你唔買樓我唔嫁你」，左丁山唯有嘆一句後生可畏。左丁山在大學與同班女同學拍拖時，一切AA制，大家都冇錢，大家都唔知道畢業後搵到乜嘢工作，那敢想到買樓，結婚時亦只係租一間梗房而已，如果當時女朋友講句：「你唔買樓我唔嫁你」嘅話，應該老早甩咗拖，各行各路，左丁山亦無資格結婚。新亞學規第四條：「祛除小我功利計算，打破專為謀職業、謀資歷而進學校之淺薄觀念。」張洪年教授話：「一頂四方帽並不只等同金錢地位的敲門磚。」大學畢業後，邊個敢講話一定可以買到樓？

張洪年教授勉勵新亞師弟妹在大學讀書，要有啲浪漫情懷，讀書因興趣而多情，因多情而浪漫於斯，今天學生唔知明白多少呢？張教授在農圃道新亞書院年代，好多學生夠浪漫，飯堂常見嘅書本係沙特、卡繆以及《先知》（The Prophet by Kahlil Gibran台灣譯作卡里．紀百倫）。呢本一九二三年出版，繙譯成二十種語言嘅詩集，英文本在美國賣咗一百萬本以上，詩集內有一首詩"On Houses"，台灣莊安祺嘅譯本：

「你們的房子不該是錨，而該是桅杆；不該是遮蓋傷口的閃亮薄膜，而是保護雙眸的眼簾。

你們不該為了穿越門戶而折起翅膀，也不該為了避免碰撞天花板而低頭，更不要為了懼怕四牆龜裂崩塌而停止呼吸。

你不該住在由死者為生者建的墳墓。

你的房子雖富麗堂皇，卻藏不住你的秘密，遮不住你的渴望。

因為你心中無邊無際的一切駐留在天空的華宅，晨露是它的門，夜晚的歌曲和靜默是它的窗。」睇英文本會覺得更有味道，浪漫情懷更濃。人老了，就會覺得紀百倫所言，浪漫過甚，但十九二十歲之時讀大學，就為「無樓不嫁」而煩惱，唔嚮往whose door is the morning mist, and whose windows are the songs and the silences of night……恐怕老咗之後，更會不快樂！