核子危機源於文化？ - 左丁山

2011年04月13日 - 蘋果

日本地震海嘯之後，核輻射危機至今未解決，日日令東北亞國家及地區無法安寧，擔驚受怕。我地一向以為日本好先進，做事穩陣到極，點解呢次咁死火呢？一般人難以理解真正原因。土木工程師建築邦向左丁山講解過兩三次，還是不明白，呢日佢叫左丁山自己睇一本專業雜誌，就係「New Civil Engineer International」（NCEI）二○一一年四月號，呢本NCEI在倫敦出版，空郵訂費每年七十二英鎊，算唔算貴，要由土木工程師決定。

呢本四月號之主題故事係HKMTR，但由於日本核能危機太震撼，故此做咗封面，根據NCEI編輯Declan Lynch嘅報導，一位英國核子專家Tony Roulstone指出日本福島核電廠危機，源於三大錯誤：

（一）發電廠之設計，無計及超高水平嘅水浸；

（二）柴油後備發電機位於其他地方，用咗九小時先至運到福島核電廠現場；

以上兩點屬於「程序工程」（process engineering）之重大過失，應該在平時工程檢討時發現到及改正，但係第三點就係深層文化原因，一位不願透露姓名嘅日本專家講嘅：（三）日本企業文化就係不願、不能批評上級，下級職員即使發現問題，會視而不見，以免得失他人。

第三點原因就真係弊弊弊，好難一時之間就改正。以前肥仔Ｋ在日本讀書，就因為以美國上課時學到嘅詰問作風，批評同學與導師嘅論點，幾乎搞出禍。肥仔Ｋ話企業內一課出事，課長唔會即時向上級（科長）報告，會與課員拼命出力，希望可以搞掂番，之後才向上級匯報，如果唔掂，問題曝光，科長又係希望在本科內解決咗問題先，到成間公司都驚動咗嘞，公司會冚住不向政府（監管當局）即時通報，如此層層cover up，直至最後爆煲。福島核電廠危機係唔係根據呢個模式發生出來嘅呢？我地現在唔知，不過英國專家就認為所有技術問題與出錯，如果經常檢討，係可以及時改正嘅！