入得到未必好 - 左丁山

2010年12月27日 - 蘋果

細路哥時睇粵語片，經常有窮表哥謝賢、張英才追求有錢表妹（林鳳、嘉玲），遭受舅父（李鵬飛）白眼，教訓窮表哥，「竹門對竹門，木門對木門」嘅道理，我地就睇到眼火爆，大駡李鵬飛（不是今天之李鵬飛）為富不仁，時代變了，做人要有新思維，要搞思想革命。

年紀大咗，認識不少現實之後，就明白「竹門對竹門，木門對木門」之豐富涵義。現實悲劇之一就係不久前蘋果日報報道窮家子在碧瑤灣墮樓喪命一事，讀了教人心酸。呢日睇now，新聞節目主持人追問一間並不太富貴嘅直資學校校長：「你接唔接受窮家子弟可以憑抽籤派位入直資？」校長冇正面回答。

左丁山現在好現實，唔會將「權利、公平」盲目上腦，清貧階層夾硬要子弟入富貴直資，對子女心理會有害無利，而讀書成績亦未必一定好過讀津中。有一位讀者以親身經驗，支持左丁山嘅睇法，讀者來郵云：

「拜讀了你十二月十九日的文章，非常認同你的論點，目前香港父母盲目將子女申請入直資名校的做法，本人實在不敢苟同，本人當年以一個連公屋亦住不起的家庭，僥倖考入半山著名的男女校，同學中不乏銀行家、醫生、律師、企業家的子女，由於家庭背景懸殊，雖然同學間絕少有歧視。但在相處期間，對一些來自清貧家庭的學生，往往產生或多或少的自卑，始終未能溶入。

這種心理，多年後的今天，依然揮之不去，日前參加了當年同學聚會，發現同學間這種隔閡仍然未除，所以本人非常同意左先生的意見，求學不必一定要入名校，只要一個人勤奮努力，總會有出頭天，僥倖進入了名校，未必是好事，反而造成兒童心理不平衡，影響一生。」

單講考試讀書以及天資、勤奮，只要立定志向，人人平等，窮學生唔會輸蝕，但係心理上，同學在聖誕去瑞士滑雪、到龍景軒飲茶之時，窮學生就只能在屋企吃雞尾包，對比十分大，有時大到連父母都忍受唔住。佛利民講過我地追求嘅係equal opportunity（同等機會），大公司、政府聘請職員，唔應該以申請人嘅住址下決定！不少名人之中，鄭海泉來自實用中學（現九龍工業）、彭玉榮（威靈頓）、林煥光（威靈頓）、唐偉章（理大校長，來自基教書院），都唔係名校校友啫。香港大富豪之中，又有幾多個係名校畢業生呀？