再講YLE - 左丁山

2011年03月05日 - 蘋果

自從寫過劍橋幼兒英文試（YLE）之後，讀者反應熱烈，繼續來郵討論再提供資料。一位女士南施傳來英文電郵，表示「香港教育醒」（二月二十五日）一文，有誤導成份，指該文引用嘅PISA資料係2003年嘅，舊啲喎。嗱，香港學生參加國際PISA測驗：由中文大學教育學院統籌，今年一月中發表咗2009年嘅PISA結果，香港學生（十五歲）仍然咁醒，在三項測試方面，名列前茅。

科學：上海第一，575分；芬蘭第二，552分；香港第三，549分；英國第十六，514分；美國第二十三，503分。

數學：上海第一，600分；新加坡第二，562分；香港第三，555分；英國492分，美國487分，遠遠墮後。

閱讀：上海第一，556分；南韓第二，539分；芬蘭第三，536分；香港第四，533分；美國500分，英國494分，相距甚遠。

上海有五千一百名十五歲學生參加中國史上第一次PISA測驗，立即稱雄世界，令美國教育界大感震驚，嘆息美國中學教育水平停滯不前，其實英國亦唔好得幾多。故此讀者南施話香港公共教育一團糟，令家長毫無信心，或者係過份憂慮嘞，只要教育局班高官安份守己，以後幾年與民休息，唔好逼老師自行編製教材……製造電子教學、教科書分拆呢啲無謂爭端令老師多多負擔，讓老師集中精神教書，香港教育唔會曳得去邊。

一位讀者Ｆ提供資料，劍橋YLE網站只係列出上海與北京係兩個位於中國大陸嘅考試中心，根本不提深圳，佢向英國劍橋詢問中國/香港有無pre-starters exam（3-5歲），正式答案係：無。所以讀者Ｆ懷疑深圳之劍橋YLE並非官方認可嘅，未必可靠。

城市大學英文系助理教授Alice Chik博士對此亦有評論，並傳來一篇佢與理工大學Sharon Besser博士合著嘅一篇論文：〈International Language Test Taking Among Young Learners: A Hong Kong Case Study〉（刊於Language Assessment Quarterly 2011年2月）指出香港一啲有錢學生參加YLE純粹為了進入英文小學英文中學，真係有意研究YLE者，不妨上網一讀。