創業易營運難 - 左丁山

2015年05月21日 - 蘋果

餐飲M以前係賓架，退休後復出江湖，居然做咗創業家，開地舖賣洋酒及橄欖油，捱吓捱吓，有成績噃，已經生意穩定，可交由兒子經營㖭。餐飲M話過：「憑老面皮及金融知識，帶住個仔做生意，我有經驗，佢有活力，正式係以老帶新，薄有成就，阿仔以後可以自己經營落去。」臨老創業而有此良好局面，無怪佢老懷大慰，不過又唔好唱得咁好，創業萬事起頭難，痛苦不足為外人道，餐飲M講佢認識一位行家嘅舊得力助手，係外國人B，憑太太之歐洲關係，得到一個歐洲名牌（女士產品）之特許經營權（franchise），於是幾個月前辭職另立門戶。都話過香港地遍地銀紙嘅啦，呢位外國人B寫好個proposal，話咁快就搵到投資者投資三幾千萬，立即成立公司開舖請人賣產品，唉吔，原來設計裝修會有延誤，請人唔係咁易嘅，與太太（歐洲人）一齊做生意係好麻煩嘅──以前兩人在家談情及閒話家常，感情好融洽，現在回家成晚講生意，如何營運，就幾乎晚晚鬧交，以前向老闆支薪，毫無負擔，現在自己睇住盤數，始發覺似乎日日燒緊銀紙，結果點呢，還未正式開舖，B太太已經緊張到病咗兩星期，B君就睇醫生食鎮靜劑，血壓上升，心情不暢。

問投資者攞錢唔係咁難，如何向投資者交代每季生意狀況及盈虧，先至係千斤擔子，啲創投基金及天使基金有好長嘅記憶，對創業者嘅要求係：一次不忠、永世不用。即使輸咗生意，創業者千萬不可輸掉誠信。左丁山以前在創投公司有一樣職責，就係審閱investee companies嘅季度報告及損益表，因職責所在，要牛咁眼睇到實，最怕俾人地用「創意會計」矇騙。有一間公司就用數冚數方式想話遮掩一筆比例上幾大嘅壞賬，俾左丁山細心分析到出嚟，向老闆呈報，老闆又好嘢，不動聲色，問左丁山呢間公司現時估值如何？左丁山答：「我地批股份應該值六千萬元。」於是老闆要求公司大股東以六千萬元回購股份，大股東還價四千萬，左丁山話削價太多，唔制，估唔到老闆立即一口應承，對方大喜，向銀行借錢支付，請我地離場。老闆笑咪咪咁收支票，左丁山為之扁晒嘴。想不到半年之後，來一次股災，該公司俾筆壞賬拖累即時沒頂，貸款銀行多了一筆四千萬元爛賬。呢位大股東之後在中環變成係邊緣份子咯，因為再難搵投資者支持也。