中年危機變咗青年問題 - 方卓如

2015年5月18日 - 信報

聯合國衞生組織，將18至65歲定為青年人，即係你做到65歲都未退得休，好正常啫。如果要做到65歲，咁你點搵一份可以畀你捱咁耐嘅工就非常重要。唔係咁多工可以畀你坐咁耐，唔係你唔得，係你後面嗰啲要升上嚟頂你個位。到50歲人，仲要send份CV出去搵工，你就真係閉翳。65前你仲要做唔停手嘅話，你點樣確保自己一直有賺錢能力，係你每日都要諗嘅課題。

競爭激烈　𡃁仔趕上位

青年係全世界嘅共同難題，原因係愈嚟愈多人嘅同時，生產力反而需要愈嚟愈少人手。而家連CEO都話唔鍾意開會，即係寫字樓要嘅人手更加少。有所不知，其實開會都養活唔少人，準備開會嘅PowerPoint就係好多人嘅日常工作，尤其係好多年輕人仰慕嘅iBanker，嗰啲美輪美奐嘅PowerPoint係佢哋唯一嘅實質出品。而家工作已經非常機動，老細成日唔喺公司唔代表冇做嘢，一個手機已經做晒以前要坐定定寫字樓嘅工作。同你廿年前入行，甚至十年前你開始當扎比較，今日啲工作模式全部唔同晒。

老鬼驚俾啲𡃁仔踢走，年輕人又怕俾啲老鬼頂住冇得上，所有打工仔嘅內部競爭係愈嚟愈劇烈，唔係你肯做肯蝕底就等於一定有份工。香港尤其競爭激烈，仲有內地人一齊同你爭。而家四五十歲嘅人，怕後生仔升上嚟，怕內地人走落嚟，廿年前學識嘅嘢而家唔係咁啱使，新嘅科技嘢自己又唔係咁跟得上。呢個年紀仲有仔女父母嘅負擔，呢啲中年危機而家變成咗青年問題。再加上真係青春無敵嘅後生仔，咁多青年人要為搵食生存頭痛，絕對係社會問題。