唔會再有「大時代」 - 方卓如

2015年5月19日 - 信報

全世界都沒有香港市場的特點，最有升值能力的股票，就係本身業務做得麻麻哋，甚至乎蝕錢，但係資產負債表簡單，沒有債務，呢啲就係市場上稱之為殼股。愈係本業做得麻麻哋，冇乜起色，投資者愈要買，呢個現象係香港獨有。

我之前講過，呢個現象係對投資者嘅最後保護，不單只唔係壞事，仲係香港欠缺小股東保護機制下，一道天然嘅逃生門。Enron嘅股東可以蝕到渣都冇，退休保障計劃放晒喺Enron嘅員工，最後乜都冇。喺香港，面臨清盤，長期停牌的公司仲可以有白武士打救，因為殼有殼價，執番靚仔又係一條好漢。賣殼其實係一個recycle過程，將上市公司循環再用。香港市場嘅活力，好大程度係因為有呢個殼嘅特點。

場景不同　張力欠奉

想知道邊啲公司係殼嘅首選，坊間已經有好多人寫過。公司蝕錢嘅，本業冇乜即時起色嘅，係先兆。減少不必要投資及業務嘅，係前奏。股價不明不白上升嘅，通常唔係無緣無故。而家市況咁旺，人人預期北水繼續南下，類似嘅尋寶遊戲，唔會停。

「大時代」如果係現今電視台嘅產品，內容未必會有當年咁震撼。冇咗個交易場所已經爭好遠。如果方展博躲在辦公室炒期指對丁蟹，畫面上邊會咁有張力？沒有一大班人寫黑板，點可能有經紀們拍手掌嘅熱鬧場面？鐵索連舟咁詩意嘅高深比喻，喺而家水平咁高嘅觀眾眼裏，冇乜神秘感。而家啲編劇就算有心有力想整套《大時代》，佢哋要認識市場操作嘅水平，比以前要高好多。如果有咁嘅認識水平，點會去做編劇，走鬼咗去炒股票啦！