調整吓心態先 - 方卓如

2015年5月21日 - 信報

呢個世界，好嘅意念唔值錢，實踐得好嘅意念先值錢。同樣道理，你睇咁多財技文章，乜都俾你睇通睇透，但係叫你照做，你都無辦法做到，因為execution唔係靠你睇幾份報紙就可以學得識返嚟。

上市公司老闆看見其他老闆搞幾單刁就身家暴升，心雄，想學做刁，大賺佢一筆。老闆未學技術之前，最重要先調整的，是心態。

你睇吓最近一致公認的刁王，佢單單都做到爆升幾倍，但係自己嘅持股比例就大跌，變成第三、第四股東。肯自己讓位，由大變細，將個場交畀好人家話事，呢個心態先可以做得成大刁。當然，如果你有幾個場，自然比得一個場攬住過世嘅更捨得放棄主場。上市公司老闆想做刁，最緊要本錢係自己唔係做一單就等於自己收山，否則的話，只可以做啲比自己細嘅刁，大嘅就唔使諗。

無為而無不為

做交易有時會用到股票，對股票價錢執着嘅，好難做得成。唔派息嘅股票其實係郵票，你揸75%同51%，對一個大股東嚟講分別唔係咁大。上市公司老闆望住而家股票嘅市價，會覺得呢個就係成本價。但對於唔派息嘅股票嚟講，佢真正嘅成本只係股本呢張紙，冇人肯買嘅話呢張紙係唔會帶畀你任何價值，除非你多到足夠將公司清盤分番資產畀你。只要過到成本呢一關，你先可以集中去睇自己做得成單刁之後有乜着數，而唔會去度人哋同你合作無端白事點解會賺得咁勁。做大刁嘅，一定要唔介意人哋賺得比你多，唔介意你又帶挈佢賺多少。做得大刁嘅本身通常已經疊水到使唔晒，再賺都用唔到，所以唔介意賺多賺少。但好奇怪，唔介意賺多賺少，反而會令你賺得更多。

上市公司老闆想轉型，唔使點睇啲技術點做，調整吓自己心態先。大時代未完，你調整完仲有大把世界。