畢業就買樓 - 左丁山

2010年11月21日 - 蘋果

到陸羽飲茶，醫生C突然出現，好久冇見咯喎，點解呢日咁得閒呢？唔通醫務所少咗病人排隊？還是古董價錢好，佢賣咗兩三件已經唔駛do呀？醫生C話：「古董市道係好好，真係百年難得一遇，我間中都會賣一兩件，但主要嘅係我係一個古董會嘅主席，現在滿任，空閒時間確係多咗。」醫生C收集古董字畫二十幾年，以前純粹為興趣，發夢都估唔到中國有今日之「盛世」，大把富豪願意以天價在拍賣場上搶貨，令佢地一班古董收藏家目瞪口呆，故此佢話一百年來未見過如此古董市場「盛世」，不必理會錢從何來，總之有錢，水浸市場啦。呢個局面會否維持一段長時間？醫生C話：「好難講嘅，學你話事偈，音樂不知何日停，繼續跳舞可也！」

繼續跳舞嘅還有樓市，熱錢多，利率低，通脹高，炒樓乃炒家常情，故此引誘到大學生講：「女朋友話冇樓唔嫁我。」又有報道話近九千名大學生趁人工未夠高之前，以單身身份申請公屋，排住隊先，似乎買樓就係幾多大學生嘅人生夢想，置業係畢業後第一優先。

在記者招待會上，碰到曹仁超，講起投資之道，佢向左丁山透露中國大富豪，騰訊創辦人兼主席馬化騰對佢講過：「我畢業後，好彩冇買到樓。」何出此言？曹仁超解釋，一畢業就顧住買樓，邊有膽量創業、做生意吖，馬化騰以佢儲蓄得到嘅資金，創辦騰訊，至有今日啫，今日嘅馬化騰就要買甚麼山頂豪宅、倫敦市中心豪宅都買得到，但如果佢當年買樓唔創業，至今可能仍然住在深圳細單位。

中貿林今天有幾多間樓，問佢至知，但畢業後住在大埔墟舊樓，慢慢捱咗好多年。佢有一位朋友遲一年畢業，搵到工後立即動用阿媽嘅積蓄做首期，在灣仔買咗一層極細單位，兩年後升咗值，結埋婚，立即賣樓搬上半山新樓，嚇親成班同學，大家上去睇吓，原來除咗原來裝修之外，就全部都係細樓嘅破舊傢俬，兩公婆日日食 麪包、即食 麪，一切為了供樓，行路返工放工，同學覺得唔好意思，唔敢再去。三年後，聽講佢地離咗婚咯，太太去咗英國，以後無音訊。嗰層樓，家好值錢，好貴，但呢位朋友仍是獨居，又聽聞佢擁有幾層樓收租，但是孤家寡人午夜夢迴，唔知覺得值唔值呢？