考銀行 - 左丁山

2010年11月30日 - 蘋果

昨日講到世姪俾八十後女士問到：「你係經理呀，月入有幾多呀？」世姪於是興起考入銀行嘅念頭，希望日後月薪加花紅可以多過現時薪酬，問左丁山點考銀行？哦，考銀行不外乎上網申請，滙豐渣打恒生等都有網上測驗，考語文與數學之類，呢啲統稱Aptitude Test，合乎要求者就會收到邀請去面試，現在時興小組討論，近乎辯論與搶答，口舌便給、外表醒目之學生，佔盡上風，反之，老實木訥，外貌冇咁靚嘅，就未免吃虧。輸咗嘅人唔使向平機會投訴，以前林行止專欄引述過美國史丹福大學嘅研究，高大威猛之靚仔靚女，一生收入係多一啲嘅。

講到Aptitude Test，有辦法嘅。上網查吓就知道有好多準備及補習嘅方法，人力資源專家Ｎ就教過佢位MBA學妹（mentee）到一家測驗專門店上堂，做吓test先，學曉了，先至去報考銀行與大公司嘅test等。呢間專門店係國際公司，在世界各大城市有辦事處，不少大公司嘅試題由該公司提供，不過補習費就要幾千蚊，幾貴o架。呢啲test是否真的測試到申請人嘅才能與心理狀況，好難講，但既然咁多大公司採用，為咗份工，都要適應吓嘅啦，各大學最好為學生畢業前免費做兩至三次測驗（自願性），由就業輔導處提供指導，咁就會加強學生搵工嘅能力嘞。

與世姪講完之後，遇到大銀行總經濟師Ｋ，佢有份為銀行面試申請人，大學生過咗test，過埋小組討論及人力資源部嘅面試後，就會見一啲高層。Ｋ先生話佢地銀行近年請咗幾多本地畢業生，以比率計，多過外國回流學生㖭，佢留意到，本地生之中，能講較好英語嘅，大多數曾到海外大學交流過，三年未曾出外交流嘅學生，講英文的確係差一啲，講唔掂，就好難獲得聘書咯。經濟Ｋ話：「以前劉校長講過，中大改番四年制之後，希望每位學生能夠在外交換一年，我好支持劉校長嘅理念，希望中大他日做得到。」目前本港間間大學都極力增加學生出外嘅機會，藉此增強學生嘅國際視野，學生唔好貪香港舒適，不願出外呀。