逆水行舟 - 左丁山

2010年09月23日 - 蘋果

科技產品市場，最合「逆水行舟，不進則退」呢一句，瑞典科技工業愛立信手機，曾經好威，而今安在？與日本新力合作製造「新力——愛立信」品牌之後，憑新力之名，亦無法令手機翻身；摩托羅拉手機大哥大，係經典之作，值得擺在博物館，一九八六時，左丁山揸住部水壺大哥大出街，中環都唔知有幾多人向左丁山行注目禮；摩托羅拉手機曾經領先全球，但大阿哥席位，早已俾諾基亞搶咗，而今諾基亞又落難，要搵美國人救亡，LG電子與三星競爭手機市場，落得大敗收場，主帥辭職。左丁山歷年用過嘅手機牌子，有摩托羅拉、Panasonic、愛立信、GE、飛利浦、三星以及現時嘅iPhone4，不得不承認，「蘋果」後發先至，成功將電腦與電話結合，成為二十一世紀尖端手機，將諾基亞拋在後頭，抵Steve Jobs沙塵。

幾年前在馬會泳池碰到電子S，問佢：「你唔係在內地咩，幾時返咗嚟？」電子S話：「賣咗廠，連上市公司股權都賣晒，退休咯，費事再搏。」理由何在呀？電子S話：「投資最新電子廠，耗資龐大，動輒以十億美元為單位，但掉錢落去，又未必會贏噃，隨時一鋪輸晒，我賣晒股票，有幾億美元，不如退休好過，買番幾間獨立屋，實冇死。」電子S之言，可能係香港廠家心聲，故此香港工廠絕少有富士康嘅規模與氣魄，可以僱用一百萬工人。但即管係富士康，賺錢能力都幾薄弱啫噃，有乜依郁就會虧本。做電子產品做大咗，經常不進則退，上市公司執董廠家C同左丁山嘆息講：「揸住一啤Q，對手一味大我，自己唔跟就似乎膽小，照跟就隨時撞正人地有三條，跟唔跟好呢，呢個係我地年年做capex（資本性支出）預算案時最頭痛嘅問題。因為唔繼續投資，會驚住落後晒，輸梗。但如果繼續落注，又驚住仍然唔夠美國、日本同南韓及台灣公司砌。」在科技行業，競爭係殘酷嘅，搞自己品牌，唔係講吓咁易，接單幫人地品牌製造（如富士康）亦需要好大投資，香港廠家諗諗吓，係唔係將盈餘用來買豪宅好過呢！所以我地香港有咁多乜乜行業大王炒樓也。