叻仔輸在太叻 - 方卓如

2016年1月20日 - 信報

前輩成日話股市專收叻仔，但係又唔講係乜嘢原因，搞到佢哋好似知道乜嘢秘密咁，故弄玄虛。查實一字咁淺，股市入面唔係咁多人掌握晒全部資訊，你知啲唔知啲，任你幾咁聰明，作嘅決定總係有啲瑕疵，情形就好似愛恩斯坦要諗宇宙起源，但係你身處其中一點嘅地球，就算你諗爆個頭，都唔慌有真正答案。唔係你唔夠料，係你唔夠資料。

但係股市仲弊，你唔夠資料，諗錯方向，但唔代表你會落錯注。你玩大細，以為自己懂得聽骰，就算聽錯，都可以俾你買中。一次又一次諗錯又俾你買中，股市遲早有一鑊唔畀你咁好彩，輸你一鑊勁嘅。不過，你係叻仔嘛，點會服氣？以前鋪鋪俾你諗中，今次失手，意外啫，下鋪加碼，一定可以翻本。加碼冧落去，再輸，唔使講梗係入肉；贏番，仲死，更加強化你係叻仔嘅地位，更加唔會認錯，下次落注你更狠。

叻仔而又覺得自己叻嘅，唔係死在蠢，係死在以為自己知晒全部。

自以為是　以偏概全

2016年會收死好多叻仔。點解？因為2016年必定嚟一次災難式大冧，叻仔就會沽完之後再撈底。而呢啲大上大落嘅洶湧時代，八年一遇，必定吸引落重注，唔會忍得手陰滋陰滋。2016年下跌唔係單一事件引發的直線下跌，而係四方八面瓣瓣唔掂嘅大攻擊。你會敢沽，但係幾時停，每個人都唔同，視乎你知道幾多嘢。

所有叻仔都係預咗沽完之後再撈底，但係你喺唔同位置停手，繼而反手買番上，決定你翻兩番定係傾家蕩產。而家全部叻仔都知道今年大鑊，大部分人都有架生可以跌又賺、升又賺，個個都摩拳擦掌準備開餐，今年有人可以彈上兩層，不過仲多人會輸鋪勁。投行好多叻仔已經知道嚟緊唔係好掂，大屋搬細屋，留晒現金準備隨時冇嘢撈。冇嘢做而又有現金在手嘅叻仔，高危。