股市通縮逐漸形成 - 方卓如

2016年1月21日 - 信報

《國產凌凌漆》有支古惑的槍，你要佢射前佢就射後，以為射後就射前，總之就係搞到你周身傷。港股唔執輸，有古惑的跌。美股上星期五大冧，本應今個星期一大家諗住港股冇運行，點知只係微跌，星期二仲要有得升，啲叻仔諗住啲人開始平倉，大市應該見底反彈，過完年先再嚟跌過。平倉買上，等2月中放假前趁高再沽。殊不知星期三就嚟一次再冧，又殺一批叻仔。今次唔關美股事，唔係A股拖累，純粹係港股自己要跌。原本大部分人都係對後市悲觀，小注小注，忍手。經過今次港股自行下跌，部分人睇怕都變成恐慌，要錢唔要貨。

千祈唔好有view

2008年同2009年最大嘅教訓，係千祈唔好有view，唔好對大市方向有view，有view即死。冇view，諗佢升又得跌又得，你會保守地設計啲組合升跌都有錢賺，只係賺得慢啲。有view，輸鬼死。去到而家嘅水位，你估佢再冧又得，見底升又得，想有view都唔容易。

2016年形勢係混合體，手影包括2008年金融海嘯大冧、1997至1998年亞洲貨幣下跌、2000年科網爆破、2002至2003年沙士推冧零售市道同樓市價格。所有你諗到嘅衰嘢，今年都有出現。既然係咁，今年香港應該好大鑊。叻仔遇到嘅難題，唔係估唔到市跌，而係諗唔到會跌幾多。沒有雷曼倒閉咁指標性嘅事件，單靠樣樣衰嘢都有啲，叻仔都唔係咁夠薑有膽成副身家冧晒落去。所以今年埋單計數，好多人會望番轉頭起勢揼，早知瞓身瞓得狠啲。

市道靜得交關，大市未跌定，好多項目都開展唔到。美國佬肯一鋪跌乾跌淨重頭嚟過，中國人要面子，好少肯認錯一鑊斬晒任由暴跌，只容許溫和下跌慢慢向下，搞到成村人都要走出嚟托市。沒有快速清倉重頭嚟過，大家都估佢仲會跌，呢個世界係唔會翻生。賤物鬥窮人，而家股市就係咁嘅形勢。個個眼白白見自己愈嚟愈窮，明明見到成街貨愈嚟愈平，但係唔會有人第一個衝出嚟買，因為估明天仲平。通縮嘅惡性循環，正喺股市逐漸形成。唔想股市通縮，唯一方法，一刀斬落去，清走晒唔夠實力嘅人。你大可以繼續去遊山玩水，第一季睇怕冇嘢可以做。