最昂貴嘅奢侈品 - 方卓如

2016年1月18日 - 信報

乜嘢叫做power？唔係去懲罰做錯嘢嘅人，而係令人自動自覺去認錯。呢幾日見到有人走出嚟認錯，但毫無見人認錯的快感，只係愈認叫人愈清醒。唔需要為自己認同嘅事認錯，喺某一特定嘅地方，原來係膽量同身家嘅考驗，係最昂貴嘅奢侈品。不過唔使氣餒，呢個世界，好多人都係未去到最後嘅一里，都沒有機會享受呢件奢侈品。

冇人估到2016年頭半個月就嚟一個股災嘅開始。2008年奧運會之後，雷曼倒閉、金融海嘯、量化寬鬆救市。到2015年底美國開始加息，呢7年嘅回氣期咁就玩完。油價下跌、股價下跌、樓價下跌、人民幣下跌、連港紙都跌，唔使識經濟學，你都應該feel到而家最緊要keep住銀紙喺身，千祈唔好亂買嘢。陸續有人話就快見底，以過往嘅歷史教訓，有人覺得見底即係仲未見底，底係要人人覺得玩完先到。而你一蚊都唔敢貪，唔敢入市，咁就係倒轉頭升嘅時候。

堵塞創作　埋沒下一代

今次跌市係唔會再有政府打救，因為冇一個政府可以有錢去救。啲錢去晒邊？去晒過去7年趁銀紙平搏命錢搵錢嘅人手上。未來生靈塗炭，仍然有批人比7年前有錢好多；只不過，呢批人係唔會攞錢出嚟救市。但係如果跌市跌到底，佢哋有大把錢出嚟收平貨。每次大升大跌市，都係財富轉移嘅時候。2016年，如果你叻仔，可能係你最大嘅發達機會。

版權條例又再恢復二讀，其實要試驗呢條條例應唔應該通過，好簡單，就係上星期嘅「毛記分奬禮」仲可唔可以搞。呢個擺明牟利嘅二次創作，大受香港人歡迎。二三十年前都有，而家更加係市民嘅心靈雞湯。冇得再搞嘅話，版權條例肯定未夠完善，要檢討。而家版權人出嚟支持嘅，似乎好耐都未創作過。由唔再創作嘅上一代叫下一代唔好再二次創作，詭異程度，接近陸續有人走出嚟自己認錯。