三次機會跳上兩層 - 方卓如

2016年1月15日 - 信報

「方帥，冇見咁耐，又係星期五，有乜有趣嘢可以講嚟聽吓，等我哋做細嘅學吓嘢？」

「有趣嘢？你一定係新嚟香港，又或者你母語唔係廣東話，而家咁嘅時勢邊度會有有趣嘢？激氣嘢、恐怖嘢、頂心頂肺嘢就大把。好彩我幾十歲人睇化晒，唔會動真氣，後生仔就真係想唔火都難。你話而家『一國兩制』形同虛設，30年後隨時真係冇咗『一國兩制』。到時我就話唔知仲有冇力去滑雪，但係啲後生仔仍當盛年，風華正茂，喺一個正常嘅香港出世，親眼見到自己由細到大熟悉嘅環境，被凌遲逐忽逐忽割走，你話恐唔恐怖？開始割到見血喇大佬，佢哋的確要諗諗，點樣面對祖國。我哋啲老嘢可以做嘅，只有企埋一邊讓路，等佢哋為自己前途打算。」

「嘩，方帥，咁沉重，問一句啫。你係咪即係話要努力搵錢，搵夠走人咁老套？」

「錯，你想搵錢都唔到你。你將來睇番轉頭，會發覺原來2015年係我哋呢代人最後嘅搵錢機會，過咗之後完全搵唔到錢。我哋呢代，2003年買磚頭，2007年買期指，2015年炒股票，有三次機會畀你跳上兩個階層，可以由柯士甸道搬上柯士甸山道。

2016年之後，弊傢伙，冇咗量化寬鬆、加息、人民幣貶值、A股冧市、港元升值、唱衰樓市、自由行減少、煞停賣殼、拒絕減辣，是但一樣都死得，仲要夾埋一齊殺到埋身。

最大鑊，係我哋要放水「一帶一路」、高鐵、「三跑」，上一代儲落嘅錢，我哋不明不白使咗佢，最慘係下一代用唔着，仲要佢哋繼續埋單。搵錢？搵到兩餐晏仔已經算佢哋叻仔。」

股市守一國兩制「有得玩」

「唔係啩？我哋啱啱出嚟做嘢，諗住大展拳腳，唔係咁快要收檔啩？」

「細路，你好彩喇，仲做緊股票呢行。全中國乜嘢都叻過你，唯獨是炒股票，綁手綁腳，輸多過贏，逼住要走落嚟香港炒股票。正因為咁，香港仲可以玩多幾年，只要股市嘅『一國兩制』可以守得住，千祈唔可以走樣。畀啲心機，唔好成日走去滑雪，做埋呢幾年，遲啲你大把時間滑。」