用報告反駁報告 - 方卓如

2015年3月17日 - 信報

互聯網最厲害亦最令人聞風喪膽嘅，就係放咗上去嘅嘢，幾耐都可以搵得返。睇番2007年Steve Jobs上台介紹iPhone，佢話一年電話出機九億幾千萬部，1%市場佔有率已經不得了，蘋果就要起碼做到呢個數。

7年之後，Steve Jobs已經用唔到蘋果表，iPhone 2014年出機接近一億七千萬部，超過晒佢當年嘅謙虛預期。

如果唔係有Android搶爛市，iPhone仲勁，只不過我哋就冇咁多好嘢玩，冇競爭點會迫到商人出真功夫。

兩招反擊沽空機構

一間公司瘋狂膨脹，一個行業極速轉型，行業大佬全面被淘汰，幾年間就可以一步到位。無論你做生意或者做炒賣，都話明你知，你跟唔切，轉身慢，結果只有死路一條。

上市公司最怕咩？好多嘢都怕，近年最怕就係畀沽空機構狙擊，出一份幾十頁嘅報告話你有賬目問題。平時唔會覺賬目可以刺激股價上升，一有賬目問題就可以將股價推冧到停牌，證明賬目呢家嘢，成事不足，敗事有餘。要對付沽空機構報告，得兩個方法。

一係即刻停牌，搵夠支持者復牌後自行買股票，挾爆沽空機構。

二就係以牙還牙，用幾十頁報告逐點反駁報告，最近例子有新加坡的Noble Group。

Noble Group嚴格嚟講，冇畀沽空機構狙擊，因為寫衰佢哋嘅公司話冇沽空股票，只係替天行道。咁有正義感嘅背後，可能只係與舊夥計有牙齒印、復仇。

無論目的如何，Noble Group就係收到長篇報告，指賬目有問題。報告一出，股價下跌16%。

賬目問題有兩種，你賬目上面嘅數字唔存在，或者你計算方法有問題。前者係低手，你話成個樹林係你嘅，點知一睇，原來冇樹嘅，就乜都唔使講。後者唔同，計算方法，你話我錯，我話我啱，邊個有時間有心機有資料去計你誰對誰錯？只要你有本事寫份仲扎實過沽空機構嘅報告，邊個嗰份難明啲，邊個就係真理。Noble Group做對外傳訊嘅，係上市委員會副主席。要辯證賬目冇問題，點會有問題？以報告反駁報告，強項。