又一個夕陽行業 - 方卓如

2015年3月16日 - 信報

退休後環遊世界，分分鐘仲辛苦過返工。你都試過長途旅遊，中間你要諗交通住宿、夜晚食乜嘢、晏晝去邊度，最慘係你唔熟路，行到腳軟。幾十歲人，好多嘢可能已經無力再玩，唔好諗而家博盡退休先慢慢嘆，就算有呢一日，你都未必覺得嘆。人生得意須盡歡呀！

瑞士鐘表業從來冇遇過重大衝擊，名貴腕表永遠有需求，而且是一浪冚一浪。後生仔未夠錢供樓，會儲錢買架車。車都未有錢買，會儲錢買隻表。表，係男孩變男人的一個成人禮標記。但係，表嘅作用，僅此而已。

鐘表商都應該知道，表本身其實已喪失實際功能，冇乜人仲會望表睇時間，純粹係裝飾同話畀人知你撈得掂。

瑞士鐘表商話，佢哋唔驚蘋果表，肯用七皮嘢買隻勞嘅客戶，唔會用七皮嘢買隻蘋果表。呢句話啱一半，本來七皮嘢買隻裝飾嘅勞，而家八千買隻有實際功能嘅蘋果鋼表，慳番六皮。

換言之，蘋果表唔單止食咗瑞士名表嘅市場，連本來冇功能只係裝飾嘅表，甚至有單獨功能例如跑步計距離嘅電子表，都一樣會被淘汰。裝飾品嘅表，你會日日換，用嚟襯衫。有功能嘅表，你會日日戴，唔會換。

買蘋果表不再買勞

結果係，你嗰啲有價有市嘅瑞士機械表，你會賣晒，因為冇機會戴。

智能電話用幾年時間就打冧晒傳統手機，搞到手機一哥都要執笠。

蘋果表一出，瑞士鐘表就會成為下一個夕陽行業。買得起勞嘅人一定買到蘋果表，而買咗蘋果表，就毋須再買勞。表再唔係裝飾品，變成貼身提示產品。而家仲有好多評論分析，究竟蘋果表賣唔賣得。

其實，問題應該係，瑞士表商仲捱唔捱得。