冇嘢好過買樓 - 方卓如

2015年3月13日 - 信報

Google話將來人類有500歲命唔係冇可能，如果真係成事，就真係人類大災難，想唔打仗都唔得。500歲命，你層樓即係要供完又按，再供完再按，幫你個孫個孫畀首期。一個家庭10份按揭，500歲人有400幾年要供樓，人間慘劇。

過去10年最佳投資係乜？呢條係我問啲有一陣子冇見嘅金融才俊嘅熱門問題。

你估佢哋點答？「賺得最多，唔使講梗係買樓啦！」你話幾無奈，連終日打滾於諗計如何用錢賺錢再賺錢嘅專家，都話冇嘢夠買樓好賺，你話讀咁多書、考咁多試做乜？

如果你有個仔，你會打算點栽培佢？讀多啲書做專業人士？佢分分鐘怨你一世，因為佢哋要長期生活喺唔夠瞓嘅世界，由讀書到返工都唔會有覺好瞓。以前識整手表都係一門手藝，養到頭家。將來專業人士其實同今日整表無乜分別，搵餐晏仔而已。

狂印沙紙 中產「下流」

中產點解下流得咁快？就係因為近十年專業量化寬鬆，狂印沙紙，專業知識普及化，令中產投資咁多金錢同時間冇晒回報。

不過，通常專業中產只懂得教自己仔女步自己後塵，因為安全、穩陣，都係會叫仔女讀多啲書，咁咪叫做隔代貧窮囉。

既然有500歲命，書就真係唔好讀咁多，早啲投入呢個世界，認識吓係乜嘢一回事，點樣求生。世界絕對唔係你睇到嘅表面運作，用買樓炒股票呢啲例子你就最易明白。

你喺報紙見到嘅事情，背後真正發生嘅絕對唔係你睇到表面嘅就會知道或估到。引申開去，我哋好多時都係活喺假象中。太過認真用腦，反而誤了大事。

500歲命，第一件事，唔使諗，做自己喜歡嘅事先啦。