成手錢唔代表會幸福 - 方卓如

2015年12月3日 - 信報

Facebook創辦人朱克伯格（Mark Zuckerberg）生咗個女之後，宣布將會捐出名下九成九Facebook股票作為慈善基金，要為個女嘅未來謀幸福。鬼佬嘅思維零舍有遠見，450億美金，畀晒個女反而冇幸福，要改善世界先至真正對佢好；呢啲概念，十個中國人九個都冇，剩下一個連仔女幸福都唔顧，只係諗自己。

朱克伯格嘅觀念，係而家嘅年輕人先有，上一代人係唔會諗到，成手錢唔代表你會幸福。北京有錢人相信大把，但係你覺得住喺北京嘅有錢人，幸唔幸福？佢哋連透啖氣都會死，生活喺毒霧之中，有四百億身家又如何？錢可以買到一間封閉安全屋吊命，但係一啲都唔幸福。

錢只係資源兌換券，當呢個世界冇資源畀你兌換，400億都係紙一堆，冇用。

但係肯捐出九成九，唔單止要睇通銀紙都只不過係紙，還要生活喺一個唔係點使用銀紙嘅環境。朱克伯格已經全世界都識，佢出嚟做事，要見任何人，唔需要學似中國土豪，手戴Patek Philippe、出入勞斯萊斯、家住淺水灣，用行頭話畀人知自己有實力，朱克伯格自己就係名牌。中國土豪要做事，身邊所有人先會問佢有冇錢。在一個認錢唔認人嘅社會，每個人都係未來cashflow嘅present value，你要使錢先可以搵錢。

靠腦筋本事　照樣闖天下

朱克伯格掉番轉，佢要搵人做嘢，大把人抬錢畀人，求佢參埋佢哋玩。朱克伯格要做嘢，唔係用錢，係用腦。佢只係捐錢，冇捐個腦，所以佢最值錢嘅工具，仲喺手。中國土豪，最值錢嘅工具，就係銀紙同關係，兩樣都唔捐得。

當中國可以出一個土產嘅朱克伯格，咁就代表社會已經進步到唔需要用銀紙同關係辦事，可以靠腦筋本事去闖天下，捐晒成副身家又如何。

但同一時間，生活環境亦都嚴峻到，大家都見到有銀紙都冇用，無路可退，唔去諗吓點樣改善生存環境，全部人都只好攬住銀紙入棺材，死路一條。

有土產朱克伯格出現，即係PM2.5（超微細懸浮粒子）數值突破2000，地下水過濾後都不宜飲用，泥土充斥有毒金屬，寸草不生。只有大禍臨頭，中國土豪先會開始諗，唔係要為咗自己下一代幸福，而係要保住自己條命。講得好似好犬儒，其實呢一日未必好遠。