2015年12月9日 - 信報
金主之可以稱為金主，必定要財識兼備，有錢唔識做，識做但莫財，都做唔到金主。金主係最頂嘅一層，但係同一層嘅金主，並唔係一式一樣。點分辨？主要看氣質。
最明顯嘅氣質分野就係爽唔爽手。爽手同孤寒並唔係同類相反詞，孤寒嘅同時可以爽手。基本上，十個金主九個孤寒，餘下一個轉咗行。
金主就係玩緊錢嘅遊戲，唔孤寒點有本事愈積愈多錢？但爽手就係睇佢點兌現承諾，講咗點畀點分，到時到候找數。
盤口開錯會輸，爽手嘅金主就係輸都要兌現，呢啲就係氣質。最孤寒嘅金主我見過，畀佢算過嘅寸草不生，都有開錯盤嘅時候，照賠，眼都唔眨，擰轉面揼。
另一樣氣質都係睇爽手，睇佢點爽手自己。孤寒嘅最低層次，孤寒人哋。孤寒嘅終極境界，孤寒自己。凡人有錢就身痕，總係要買吓嘢作為獎勵。最孤寒嘅金主，連自己都刻薄，生活簡單過大學生，大學生無論點慳都要自己嘟卡買避孕套。
最慳嘅金主，其實乜都試過晒，好嘢食過，靚酒飲過，從聲色犬馬中洗盡鉛華回來，戶口嘅係數字，夾萬嘅係一疊疊紙。
佢哋唔係刻意唔用錢，而係無端端搵唔到原因要去使錢。見佢嘅要着西裝，佢見人着件飛機恤搞掂。着件飛機恤坐喺會議枱，一出聲全枱人都知邊個係大佬，呢啲咪就係氣質。
最後，唔使多講，愈厲害嘅金主，愈唔使講嘢， 聽。未見過金主喜歡吹水，吹水都有時間成本，花得起呢個成本嘅，唔應該有時間真正去諗搵錢嘢。金主開口講嘢，目的唔係想講嘢過你知，係想引你講多啲嘢畀佢聽。佢唔止識喺人口袋搵錢，仲識喺人把口攞料。
懂得聆聽，說話唔多，收收埋埋，仲唔係氣質？
沒有留言:
發佈留言