叻仔未必想做到最頂 - 方卓如

2015年12月8日 - 信報

金融行業成條食物鏈最top嗰一層，應該係呢一行所有人嘅最高目標，皆因呢一層係食得最厚肉，而且屬風險最可控嘅境界。有啲咁嘅事？唔係話風險同回報係掛鈎咩？

最厚肉應該最危險先啱喎？你又一次被人洗腦，風險高回報高，係用嚟氹你買啲垃圾嘢，亦同時用嚟賣啲回報低嘅嘢，將佢包裝成風險低，你咪收少啲都肯買。

雷曼債券可以蝕到一蚊都冇剩，渣都冇；風險超高，回報只係可憐嘅接近定期，你仲相信風險回報成正比？

最孤獨嘅行業：金主

食物鏈最高呢一層，要畀個title佢，最貼切應該係金主。金主呢兩個字，一睇就知，就係有錢嘅意思。冇錢嘅係做唔到金主，唔會有機會做最厚肉嗰一層，空手道只可以做派牌，落注嗰個先有得贏。不過，有錢唔係重點，有錢嘅人何其多，還要做「主」。做得主，要有技術、有deal source、有網絡，最重要係有腦，諗到唔同嘅方法之餘，仲要聽得明唔同嘅建議、邊樣最着數。有錢有腦，先可以做到金主，做到最高嗰一層。

人哋話最孤獨嘅行業，係作家同政客，只係聽自己一個，唔可以旨意其他人。其實，金主都係差唔多，作為最頂嗰一個，下面全部只可以聽命於你，唔能夠人哋講乜你就聽乜。金主有時會同金主二號合作，甚至三號、四號，作個金主聯盟。但係個個都又有錢又有腦，一山已經不能藏二虎，兩隻老虎迫在同一個山窿，好易打交。所以金主通常都係獨來獨往，偶爾幾個老友合作不同項目，整體上都要各自各。

點解唔係咁多人會上到金主呢個位？因為金融呢一行，太多人讀得太多書，太多叻仔。叻仔最叻嘅，係計算。

當叻仔去到第二、第三層時，已經豐衣足食，幾部車、廿隻錶、一隻艇，仲點會諗再用力行多步，做金主？金主係孤獨嘅，但係金主下一層就好熱鬧，熱烈地彈琴熱烈地唱，使鬼咁辛苦行多步。金主唔係神秘行業，做得有名堂嘅金主，好多人都聞其名，只不過唔係咁多人夠意志力行到呢一層。而且，講真嗰句，地球生產力過剩，要過舒適生活唔需要好多資源，金主嘅生活唔係好得過下兩層好多，分分鐘生活質素普通過中產，唔使做到最top，你都夠嘆埋下半世。