兩樣嘢未跌到底 - 方卓如

2015年10月7日 - 信報

我師傅好耐冇出過場，係時候講吓佢有乜訓示。佢老人家咁耐唔見，當然係去咗逍遙快活，四圍遊歷。佢有上岸嘅本錢，但抱住在岸嘅心態，介乎當局與旁觀者之間，睇嘢特別清楚。

佢去完有靈氣有生活質素嘅地方短住，回來後自然覺得香港係地獄。佢睇見呢度有咁多飽讀詩書、有頭有面嘅斯文人，不惜抓破面皮做小丑，換取一啲若有若無的功名利祿，可見人心墮落比股市更甚，跌起嚟可以無底。

不過，我師承佢嘅「認真便輸了」嘅心法，佢嘅道行梗係唔會因此動氣。佢話股市同人心墮落一樣未到底，因為冇咩嘢公司做生意有計做得好，fundamental肯定唔好。雖然fundamental同股價冇必然直接關係，但係炒股票嘅熱情喺半年時間內消散晒。生意賺得唔多，股票又唔炒，股市邊有運行？咁等乜嘢？一係等大冧，一係等印銀紙。至於加息，我師傅話今年一定冇，出年都唔一定，銀紙有排唔值錢。

做有錢嘅窮人好爽

經濟唔好，股市未必唔好，仲有，經濟唔好，生活質素亦未必唔好。過去4年經濟好到暈，你覺得自己生活水平好高咩？有好嘢唔到你買，你永遠覺得唔夠錢使，每個階層都有人同你爭資源，唔見得你會好happy。

好多人唔知，做個有錢嘅窮人開心過窮嘅有錢人多多聲。有錢嘅窮人，生活喺草根平民百姓level，食乜買乜，隨心歡喜，去旅行買張特價機票即刻走得，睇嘅嘢同有錢人睇嘅九成九一樣，不知幾爽。

窮嘅有錢人，你揸458人哋揸緊488，你坐商務人哋坐私人飛機，你隻船40呎人哋100呎，你喺圈子入面永遠唔夠人爭，永遠係低人幾級。人比人通常喺有錢人圈子先出現，窮人好少互相比較。窮嘅有錢人，心情經常差過有錢嘅窮人。錢，你就係得咁多，過窮嘅生活同有錢嘅生活你可以揀，唔同揀法你心情都會唔一樣。經濟唔好，大圍氣氛令你過啲簡單啲嘅生活，隨時開心到你唔信。